والد صديقتى مات

قالت الفتاة : والد صديقتى مات ..أنا حاسة بالحزن أوى عليها
وحضرتك دايما تقوليلى ان فى كل مصيبة بتحصل لنا فيها خير
طب ايه ممكن يكون الخير فى المصيبة دى ؟

قالت الأم : حبيبتى

لازم يكون عندنا يقين ان وراء كل مصيبة بتحصل لنا خير
سواء عرفنا الخير دا أو لم نعرفه

لان ربنا سبحانه وتعالى يقيناََ مش عايز يعذبنا
ربنا بيقول لنا : (يريد الله بكم اليسر و لا يريد بكم العسر )
و بيقول لنا ( يريد الله أن يخفف عنكم )
ربنا بيحبنا و لا يريد لنا الشر

لكن ساعات كتير لازم يحصل لنا الشر دا لخير وراه

يعنى ممكن نصاب بمرض علشان نكتسب مناعة منه ومايجلناش تانى
ممكن تحصل لنا حادثة عربية علشان نجدد العربية و نصلح البايظ فيها
لازم نجيب درجات وحشة علشان نجتهد و ما نهملش تانى و نتعلم الدرس

ممكن الخير دا يكون دلوقت ..و ممكن مانعرفوش الا بعدين ..و ممكن ما نعرفوش خالص و ربنا وحده الى يعرفه
زى الى ربنا يبتليه بالمرض المزمن و يصبر عليه تكفيرا لذنوبه او رفعا لدرجته فى الجنة ومش هيحس بكدا الا فى الآخرة

ممكن ربنا يبتليه بفقدان عزيز عليه (زى صاحبتك كدة ) علشان خير للميت نفسه ..انت عارفة ان والدها كان مريض اصلا و تعبان فكدة ربنا ريحه من آلامه ..ويكون دا تكفيرا لذنبه

ممكن ربنا يبتلينا بانسان سىء فى حياتنا علشان يختبر اخلاقنا و قوة ايماننا وندخل الجنة بصبرنا عليه

ممكن ربنا يبتلينا بالفقر لانه يعلم اننا لو اتغنينا هنصرف فلوسنا فى الحرام و هتكون الفلوس فتنة لينا

حبيبة قلبى :

عايزاك دايما ترددى بينك و بين نفسك

(و عسى أن تكرهوا شيئا وهو خير لكم و عسى أن تحبوا شيئا و هو شر لكم و الله يعلم و انتم لا تعلمون )

الله يريد لنا الخير ..و لكنه قد يبتلينا بالشر حتى نحصل على الخير الى فيه ..او الخير الى وراه ..او الخير المخزون لينا فى الآخرة
فالله يعلم و انتم لاتعلمون

خليكى دايما مع صحبتك و خليها دايما تدعى لباباها علشان هو دا الى هيفيده دلوقت
و انتى ادعيلها ربنا يفرغ عليها صبرا و يثبتها يارب