قال :انا خلاص داخل علي ٣٢ سنه ولحد دلوقتي مش لاقي عروسه يكون فيها اللي بتمناه وانا مش طالب المستحيل تكون جميله مؤدبة اثق فيها طبعا ولا مره اتجمعت الثلاث صفات مع بعض يعني ممكن الاقي حد اثق فيه ومؤدب بس مش جميله او العكس يعني بدلوا الصفات براحتكم هو ده مستحيل انا كبرت وخلاص زهقت استنا واتمسك ب رغباتي اللي مش مستحيلة ولا اتجوز اي واحده معرفهاش وخلاص
أخى الفاضل :
قبل ما تحدد المواصفات ..حدد انت عايز تتجوز ليه ؟ هدفك من الجواز ايه ؟ اعد مع نفسك كدة و اسأل نفسك ما الذى يحققه لى الزواج من اهداف احتياجات و رغبات ...يعنى نفسك تتجوز ليه ؟
اوعى تتجوز علشان لازم الناس كلها تتجوز ...حدد بالظبط احتياجاتك
و على هذا الاساس رتب المواصفات الى انت عايزها فى عروستك كاولويات
على سبيل المثال :
واحد عايز اساسا يرتاح جنسيا ..دا هيحط الجمال و الانوثة كاولوية
واحد عايز صديقة تشاركه حياته كاولوية ..هيحط العقل و التقارب الفكرى و الذكاء كأولوية
واحد عايز واحدة تخدمه ..هيدور على ست بيت ممتازة و طباخة شاطرة كأولوية
واحد عايز واحدة زى امه ..تستحمله و حنينة عليه ...يبقى عايز بنت صبورة و حمولة و مستكينة
حدد بالظبط ايه اولوياتك فى الجواز علشان تحط المواصفات فى اولويات و تختار على حسب الاولى ليك
ردا على سؤالك هل اتجوز اى واحدة و خلاص ؟
ارفض طبعا هذا الأمر ...لازم تكون مقتنع بيها عقليا ...و حاسس بالقبول الشكلى مبدئيا و حاسس بالانجذاب ليها ..يعنى العقل و القلب و العين مبسوطين و مرتاحين و عايزين يعيشوا معاها
يا اما هتفضل طول عمرك حاسس انك قرفان منها و مش عارف تحبها
و ياسلام لو كمان طلعت مقرفة و تطلع عينك و مش قادر تنفصل عنها هيبقى العذاب
بص يا ابنى :
الجواز الناجح من خلال خبرتى يعتمد أساسا على عقلكم و ذكاؤكم انتم الاتنين
بدال ما انت حاسس ان وقتك بيضيع فى البحث ..
.حاول تطور انت نفسك و ذكاءك و معرفتك علشان تكون زوج واب ناجح ...
يعنى اتعلم ازاى تقدر تكسب قلبها و تقنع عقلها و تسعدها قبل كمان ماتدور على احتياجاتك و رغباتك
اتعلم ايه الاختلافات النفسية بينك و بين المرأة و ازاى هتتعامل معاها
لو فيك عيوب فى شخصيتك ممكن تسبب ازمة زوجية حاول تصلحها من دلوقت
اتعلم ازاى تربى ولادك صح و تنظم حياتك بين اسرتك و شغلك و اقرأ و اتعلم
المهم تنتهز فرصة الانتظار لتأهيل نفسك كى تكون زوج و أب ناجح
كل ما تقرأ نفسك اكتر و تحدد انت عايز ايه
وكل ما هتقرأ و تتعلم فى الموضوع دا ..
كل ما ستضح الرؤية ليك اكتر للمواصفات الى انت عايزها تحديدا
لحد ما تلاقيها و تقول هى دى
ليست هناك تعليقات:
إرسال تعليق