وكلمة التدين ليها أشكال كتيرة أوى
فيه تدين ظاهرى يهتم بالشكل الخارجى فقط ...زى المظهر و الذهاب الى المساجد و السلوكيات الظاهرية من غض البصر و عدم المصافحة و الكلام زى جزاكم الله خيرا و يارك الله فيكم
فيه عبادى روحانى ..يهتم بالعبادات و العلاقة مع ربنا جل و علا ..كالصلاة و الصيام والنوافل والحج و العمرة
فيه تدين أخلاقى سلوكى ...يهتم بتحسين الاخلاقيات مع الناس ...و القدرة على كف الأذى عنهم و احتمال أذاهم
فيه تدين عقلى علمى ...يهتم بالثقافة الدينية و حفظ القرآن و الحديث و طلب العلم الشرعى
و فيه تدين سياسى ...كل اهتمامه بالسياسة الشرعية و اقامة دولة الاسلام و الخلافة و غيرها
كل واحد متدين بيكون اهتمامه بجزئية معينة من الدين أكتر من غيرها
و دا مش غلط و لكن هو اختلاف طرق التدين على حسب شخصية كل واحد
فالرسول مدح طالب العلم و جعل علمه سببا فى دخول الجنة
و مدح الخلوق و جعل خلقه سببا فى دخول الجنة
ومدح العباد و جعل عبادتهم سببا فى دخول الجنة
و مدح المجاهدين و جعل جهادهم سببا فى دخول الجنة
للأسف يخطىء الآباء حين يفرضون شكلهم المفضل للتدين على ابنائهم و يجبروهم عليه ..حتى يكره الطفل الدين و شعائره
فماذا تنتظر من طفل بيتضرب و يتهان و يصرخ فيه يوميا علشان محفظش القرآن الى عليه ....هل دا هيحب القرآن ؟
ماذا تنتظر من طفل يتضرب و يتهزأ و يتعاقب كل يوم علشان الصلاة ...تفتكروا مش هيكره الصلاة ...دا ممكن يكره ربنا نفسه
لو عايز تربى راجل متدين ...ازرع جواه حب ربنا ...و اشرح ليه اسماءه و صفاته ...و اربط تعاليم القرآن بالحياة ...لما يواجه مشكلة فيها أصل من الكتاب و السنة قل له ان ربنا بيقول كذا و الرسول صلى الله عليه و سلم بيقول كذا ....علشان يحس ان القرآن دا منهج حياة مش مجرد كلام و الفاظ لازم نجفظها علشان ما نتضربش
لو لقيت خصلة حلوة فى ابنك امدحها و قل له ربنا بيحبها
لما تحب تحسسه بالنعم الى هو فيها فكره ماذا انعم الله عليه من نعم علشان يحبه
لما يتعرض لمشكلة خليه يلجأ لربنا و يدعيه ولما تتحل قل له شفت ربنا استجاب ليك ازاى
لما يتعرض لموقف حصل زيه ايام الرسول قل له كيف تصرف رسول الله و حببه فى الرسول بافعاله و تصرفاته مش بحفظ نسبه و اسماؤه و زوجاته و اولاده
التدين الحقيقى عقيدة فى القلب و رباط يربط الانسان بخالقه ...وهو دا المطلوب منك تحديدا ..انشاء هذا الرابط و تعليمه ازاى يحافظ عليه
اما شكل التدين الذى يريده الولد ..فلما يكبر يبقى يختار هو الشكل الى هو عايزه ..
ركز فى حبه لله و رسوله أولا
ليست هناك تعليقات:
إرسال تعليق