سألتنى : أنا مخطوبة و مقبلة على الزواج فما هى الكتب التى تنصحينى بقراءتها...مع العلم انى لا احب القراءة ..يعنى حاجات بسيطة و سريعة!!!!!!!
مشكلة هذا الجيل هو عدم حبه للقراءة ..و عدم رغبته فى التعلم
اتعود انه ينجح من غير مايذاكر ..بالفهلوة
اتعود انه ينجح بالغش احيانا
اتعود انه يذاكر من مذكرات وورق دروس تديله المختصر المفيد بسرعة ليلة الامتحان
اتعود انه يصم ولايفهم
و بعدين ييجى يواجه تحولات خطيرة فى حياته زى الجواز ...برده داخلها بالفهلوة ..و بمعلومات خادها من هنا و هناك ..ويقولك مش بحب اقرأ ...طب هتتعلم ازاى من غير قراية ؟؟
و لما يفشل يلقى بالمسئولية عن الطرف التانى ...أصل الامتحان كان صعب ..اصل المراقبة كانت سيئة و ماسمحوش بالغش ..ماهو لو انت مذاكر صح مكانش هيهمك صعوبة الامتحان ولا المراقبة السيئة
الحياة دلوقت اصبحت فى منتهى التعقيد ..و هذا التعقيد دخل فى بناء الشخصيات الانسانية ...اصبح عندنا عقد و شراشيب و كلاكيع
الناس زمان كانت بسيطة و الحياة بسيطة و الجواز بسيط
زمان كان الناس بتركب الحمار ...اى حد كان ممكن يركب الحمار .. بيأكل الحمار برسيم و خلاص ...كانت بسيطة
دلوقت لازم تتعلم سواقة و لازم تمتحن علشان تاخد الرخصة و لازم تحوش علشان تجيب عربية و العربية محتاجة بنزين و ماية و صيانة كل شوية تتخبط و توديها للصنايعى و حكاية و شغلانة
الفرق بين جواز زمان و جواز دلوقت زى الفرق بين الحمار و العربية
أى كتاب فى العلاقة الزوجية مفيد
اى كتاب بيتكلم عن الاختلافات بين الرجل و المرأة بصفة عامة
اى كتاب بيتكلم عن الاختلافات الشخصية و الطبائع الانسانية و اختلافاتها
كل كتب التواصل الناجح مع الناس هتكون مفيدة جدا
كل كتب التنمية البشرية هتكون مفيدة لبناء شخصيتك
لن أختار لك كتاب و أقولك هو دا لان كل كتاب بيتناول جانب فى العلاقة الزوجية
و لانى بعد اكتر من 12 سنة قراءة فى العلاقات الانسانية ..لازلت بتعلم حاجة جديدة من كل كتاب اقراه
المهم انك تنوى تذاكرى كويس علشان تنجحى فى الامتحان الى مش هينفع فيه مذاكرة قبل الامتحان و لا هينفع فيه الغشsmile emoticon
ربنا يوفقك
ليست هناك تعليقات:
إرسال تعليق