ابنى مش بيسمع الكلام

منى عين أى أب أو أم طفل مطيع تقول التوجيه أو الأمر يتنفذ علطول

طفلك حبيبتى مش كومبيوتر تعملى كليك او تاتش يقوم ينفذ الاوامر بالظبط

طفلك انسان بيفكر و بيحس و بيتعلم و عنده شغف رهيب لتجربة كل حاجة و أى حاجة

طفلك انسان له عقل لازم يقتنع
و له قلب لازم يحب الحاجة دى ..
ولازم يتدرب على السلوك الى انت عايزاه
و ساعات بيحب يجرب بنفسه
و احيانا يستهويه الغلط و يبقى نفسه يجربه
و غالبا كسول و مش عايز يعمل الواجبات و المسئوليات الى عليه

و دا زى اى بنى آدم فى الدنيا
احنا نفسنا آباء و أمهات كدة

حطيها قاعدة فى حياتك ....طفلك بنى آدم صغير 
 لا تتوقعى ابدا ان اول ما تقولى هيقتنع و ينفذ
لان احنا الكبار صعب أوى نقتنع بتغيير عاداتنا و سلوكياتنا ...و حتى لو اقتنعنا اننا بنعمل حاجة غلط صعب أى ننفذ

لازم تعدى معاه
و تقنعيه ليه الحاجة دى صح و ليه الحاجة دى غلط ...
و بعدين لو طفل صغير تحببيه فى الحاجة دى بانك تجيبى قصص و حكايات عن ناس بيعملوا الحاجة دى و ازاى كانت اخرتهم حلوة و العكس
و ممكن اغانى
و ممكن تذكريه ان ربنا بيحب كدة
و بعدين لو حاجة محتاجة تدريب هتدربيه بالتدريج
يعنى حاجة محتاج مهارة معينة هياخد وقت علشان يعملها

محتاج مرة و اتنين و تلاتة و عشرة لحد ما ينفذ ..هم الاطفال كدة
بس احنا الى مابقاش عندنا صبر