الطفل العصبى غالبا بيبقى أحد الآباء عصبى ...فبيقلده
او ممكن هو فعلا طباعه حساسة و يسهل استثارته بسرعة
و استثارته بتكون عنيفة و زيادة عن اللزوم
التعامل مع الطفل العصبى محتاج الى هدوء أعصاب و طول بال بقدر الامكان لا تقابل عصبيته بعصبية و عند و عنف لفظى او سلوكى لان دا بيزوده اكتر
و هو صغير لايعى لسة الغلط من الصح ....
لما ابنك يتعصب خديه فى حضنك و بوسيه و حاولى تهديه و ماتعمليش عقلك بعقله و تواجهى صراخه بصراخ او عنفه بعنف ....
لانك انت كدة بتديله رساله ان تصرفك مقبول بدليل انى بعمل زيك أهو ...و بيبقى حاسس بالظلم اشمعنى هى تعمل كدة و انا معملش ..
اشمعنى غلط انى اعمله و مش غلط ليها.....فيرسخ السلوك فى ذهنه
لما يكبر و يفهم الصح من الغلط نبدأ نتكلم معاه فى لحظات الهدوء ..ان تصرفاتك دى غلط
و ان مشاعرنا لازم نتحكم فيها بالعقل
القاتل و المجرم الى بيعور الناس دا بيبقى كدة ...منفعل جدا و فى لحظة مش قادر يمسك اعصابه بيرتكب جريمته ...فانت لازم تتعلم تسيطر على عصبيتك ...لانك لو سبتها هى الى تتحكم فيك هتؤذى نفسك و تؤذى الآخرين
مش هنقدر نمنع العصبية و احساسك بيها ....لكن مش من حقك ابدا تؤذى حد لا بالكلام و لا بالفعل و هو دا الى هتتعاقب عليه
و نبدأ نحط معاه عقوبات و نتفق معاه عليها ..
.و لو انت نفسك كدة يبقى العقوبات هتسرى عليك و عليه ...دا هيكون دافع ليك انك تصلح عصبيتك ...و تتحكم فيها
وبدال ما انت قاعد تبرر عصبيتك ...و تعاقبه هو عليها
هيعرف و يفهم ان ماما او بابا يعانون ايضا و هم معايا و بيساعدونى و انا كمان بساعدهم فى التغلب على الطبع دا
هتلاقى نفسك مع الوقت فعلا بتاخد بالك و مش عايز تبين عصبيتك ادام ابنك
علميه لما يحس بالانفعال يدخل يتوضى او ياخد دش او يخرج يتمشى او يتنطط شوية او يدخل اودته و يقفل على نفسه بدل ما يؤذى حد او يكتب مذكرات لو كبير شوية ..خلى فيه بديل للتنفيس
المهم تتعاطفى معاه و تحسسيه انك بتحبيه لكنك مش موافقة على الطبع دا و بتساعديه انه يتغلب عليه و انت معاه
ليست هناك تعليقات:
إرسال تعليق