لما ابنك الصغير الى عنده سنتين مصمم انه يروح يمسك فيشة الكهرباء ...
و انت شايفاه و هو رايح ناحيتها بيتسحب و بيبص عليكى...
فتيجى فى مخك فكرة انه بيتحدانى ..
عارف الغلط و مفيش فايدة و رايح برده ليه ..
فدا بيخليكى تتنرفزى طبعا ...و ممكن تزعقى ...و ممكن تضربى
لكن لو غيرنا الفكرة ....وبدل ما تبصى ليه انه بيتحداك ..
هتبصى انه طفل صغير و عنده حب استطلاع رهيب و حب لمعرفة الاشياء ..
هو مش بيتحداك هو عايز يعرف انت ليه بتمنعيه من البتاعة دى ..
هيموت و يعرف
لما بنتك الى عندها 7 سنين تطلبى منها انها ترتب اودتها و ماتعملش
انتى بتاخدى عدم الاستجابة على انها اهانة ليكى و عدم احترام لكلامك ...فبتتعصبى و تصرخى
لكن لو اخدتيها ان الموضوع هى مش مقتنعة بيه ....و مش متعودة عليه
و عندها احساس ان هيجرى ايه لو سبنا الاودة كدة يعنى ..
هى مش حاسة ان الموضوع مهم زى ما انت حاساه ..و ان فى ايدها لعبة او حاجة بتعملها اهم بكتير من ترتيب الاودة بالنسبة ليها
دا هيقلل احساسك بالغضب ...و هيخليكى تحاولى تقنعيها بالعقل
و تدربيها بهدوء ...تعالى نرتبها مع بعض ...و تكلفيها بمهمة و انتى تعملى حاجة تانية ..و تعدى تتكلمى معاها ساعة الترتيب ...و تشجعيها و تحفزيها و تقوليلها هايل ..ممتاز ...انتى كدة بتخلى وقت الترتيب وقت ظريف بالنسبة ليها و هتشجعيها انها تكرر التجربة
لما ابنك الى على أبواب المراهقة و بدايات البلوغ يتكلم معاك بمنتهى قلة الأدب ...هو مش بيعمل كدة علشان هو مش بيحترمك ..
دا ممكن بسبب التغيرات الهرمونية العنيفة الى بتحصل فى جسمه بتخلى حالته العصبية و النفسية متوترة دايما
غيرى الفكرة الى فى مخك عن اولادك
هم مش أعداء عايزين ينرفزوك و يستفزوك و يعندوا معاك و يتجاهلوك
هم أطفال ..
أطفال يعنى الاصل فيهم الجهل و الكسل و اللامبالاة
هم أبيض ياورد
و يمكن اخدوا منك و من والدهم حاجات كتير غلط بحكم الجينات و القدوة
وانتى مهمتك انك تعلميهم بالاقناع
و تربيهم بالحب و الاحترام
تزرعى فى مخهم التفكير السليم
و تحاربى الكسل
و تغرسى فيهم الاحساس بالمسئولية
ودا محتاج سنين و سنين ...مش هيتصلح بضغطة زر
ليست هناك تعليقات:
إرسال تعليق