نوبات غضب الطفل

- حاولى الفتى انتباه طفلك الى حاجة تانية ...(شفت العصفورة )

- لو كبير شوية يعنى من بعد السنتين و غضبان علشان عايز حاجة و انت رافضة
هتتعاطفى معاه و تقوليله انا عارفة و حاسة انك عايز كذا لكن مش هينفع علشان كذا
(لا تقل لا إلا إن قلت لماذا )
ماتعديش ترغى كتير و تتكلمى كتيرو هجيبلك و اعملك فى محاولة لتهدئته
كونى حازمة مش هينفع علشان كذا و خلاص
لازم يتعلم ان مش كل طلباته هتكون مجابة و ان الغضب بالاسلوب دا مش هيجيب نتيجة

لو بيعيط علشان حس بالفشل يعنى كان عايز يعمل حاجة و معرفش يعملها..لعبة مثلا 
خديه فى حضنك و طبطبى عليه و قوليله هتتعلم و تعملها بعد كدة ..علميه ازاى يتخطى الفشل بتفاؤل و امل

لو وقع او اتخبط خديه فى حضنك وبوسيه و سيبيه يهدأ براحته ..لو فضلتى معاه لحد مايهدأ هيتعلم ان دا اسلوب كويس للفت انتباهك والاستحواذ عليكى و هيسوء فيها

لو بدأ يهدأ كان بها هنبوسه و نحضنه و نقوله برافو عليك انك بطلت عياط و صراخ علشان يحس ان دا سلوك كويس انه يتحكم فى عياطه و صراخه

لو مصمم يكمل صراخ و بيزيد يبقى تسيبيه يرن

او قوليله لو انت مصمم تعيط من فضلك ادخل الاودة بتاعتك علشان انا مش عايزة اسمع صوتك و بيعمل لى ازعاج

و تسبيه لحد مايهدأ لوحده

استمرارك و ثباتك على الطريقة دى هتخلى نوبات الغضب معدلها يقل الى حد كبير جدا لانه بيتعلم خلاص ان الحركات دى مفيش منها فايدة فى تنفيذ رغباته

لا هستفزهم
و لا هيلبوا طلباتى

نقطة مهمة :

- ساعات الأم بتكون مسيطرة جدا و طول النهار أوامر و تعليمات و عايزة تمشى اولادها على نظام فى كل حاجة و لا تسمح ابدا بالغلط و هى الى بتوصل الاطفال لكدة ..و بيبقى الغضب نوع من الثورة عندهم

اسمحى ببعض الحرية للطفل فى حياته
اديله فرصة يعيش جزء من اليوم بدون تعليمات و توجيهات لان دى حاجة تنرفز جدا و خاصة ان الاطفال يعشقون الحرية

- الأم الى معندهاش وقت انها تعد مع طفلها ...و تتكلم معاه و تلاعبه و تسمعه ..ساعات كتير اطفالها بيلجأوا للسلوك دا لجذب انتباهها و بيكون نوبات الغضب دى صرخة بتقولها ..ارجوكى اهتمى بى شوية
فلو حاسة فى نفسها بعض الاهمال ليه اديله وقت اتكلمى معاه او العبى معاه

- الأم الى مدلعة ولادها أوى و كل طلباتهم مجابة ...برده بيلجأوا للاسلوب دا لان قلبها ضعيف ياعينى و مش بتستحمل عياطهم فعلطول تلبى طلباتهم

- فيه أطفال طبعا بتقلد ..بتقلد الوالد لو غضوب او بتقلد الام فى ثورتها و غضبها و دى حلها انك تقدرى تسيطرى على نفسك علشان يتعلم ان الغضب دا ممكن نسيطر عليه و نسيطر على سلوكياتنا

الغضب مشاعر لا ارادية لكن ممكن بالتدريب لينا و لاطفالنا نسيطر على سلوكياتنا الناتجة عنه و دا الى احنا عايزين نعلمه لاولادنا