من أسوأ العادات الاجتماعية الموجودة فى بعض الاوساط هى عادة كشف الهيئة
يدخل العريس علشان يشوف العروسة ...ماتعجبوش يخرج مايرجعش و لو ذوق شوية يعتذر
عادة فى منتهى القبح و اللاإنسانية ..كما لو ان البنت دى معندهاش احساس ..كما لو انها سلعة معروضة على المشترى
أنا مش عارفة الآباء و الأمهات بيسمحوا بهذه البشاعة ازاى ؟
فيه ألف طريقة و طريقة ممكن يشوفها بيها و يكلمها بدون ماتعرف ..و بدون ماحد يعرف ..علشان لو ماحصلش قبول ما تبقاش متضايقة
يا معشر الآباء ...هذا الأمر يحطم نفسية البنت و يفقدها ثقتها فى نفسها
هو احنا هنفضل لحد امتى نمشى ورا العادات و التقاليد لحد ماندمر الاجيال جيل ورا جيل
لو كنت شاب ...و متقدم لواحدة ..اطلب طلب صريح انك تشوفها من غير هى ماتعرف ..انت ماترضاش لاختك انها يتعمل فيها كدة ...و ما ترضاش لنفسك برده انك تترفض لانك مش وسيم
و لو انت بنت ارفضى رفض تام انك تدخلى علشان الزبون يعاين البضاعة ..انت لست بضاعة ..و اطلبى مقابلته مع حد من اخواتك او والدتك خارج البيت لوحدكم و من غير ماحد يعرف ...علشان انت نفسك تعاينيه مش هو الى يعاينك ...
و لو كنت أم أو أب ...ارحم بنتك من عذاب الرفض ...و اطلب من العريس انه يروح لها شغلها لو بتشتغل او يشوفها و هى خارجة مع والدتها فى اى مكان
فيه حلول كتيرة جدا جدا ...بس احنا الى مخنا صدأ ..و الى اتعودنا عليه بنعمله حتى لو كان مدمر
ارحموا بناتكم
ليست هناك تعليقات:
إرسال تعليق