عدم التقدير
مابيعملش حاجة فى حياته غير انه بيروح الشغل و ييجى من الشغل
هى بتعمل ايه يعنى طول النهار ماهى قاعدة طول النهار على الفيس و التليفزيون
انت عملت لنا ايه يعنى اكتر من الى بتعمله كل الرجالة
هى بتعمل ايه يعنى زيادة عن الى بتعمله الستات
الاحساس بعدم التقدير لجهود الآخر ...و ايصال هذا الاحساس ليه قاتل للحب
غير منظار الرؤية من هو ما بيعملش ايه الى هو بيعمل ايه
و حس فى قرارة نفسك انه فعلا بيتعب علشانك
و اشكره على تعبه
و حسسه انك مقدر مجهوده
و امدحه على مايقدمه
و اظهر اعجابك باى شىء مهما كان بسيط
فان عدم التقدير يقتل الحب
حب التملك
انا بتضايق من علاقتك باصحابك
انا بتضايق من علاقتك باخواتك
الشغل واخدك منى علطول
ما تروحيش لاهلك
اقعدى من الشغل
انا مابحبش الاختلاط بالجيران
مفيش حاجة اسمها اصحابك الست مالهاش الا بيتها
الحب ليس تملك
الحب علاقة بين اتنين كل واحد فيهم كان له حياة كاملة ...شغله و اهله و اصحابه و هواياته و نشاطاته الاجتماعية او الثقافية او الدينية
الحب مش معناه انى استغنى عن الكون كله وهو يبقى كل الكون ..هو ممكن يكون أهم واحد فى الكون بس مش مركزه ..مركزه أنا
ولا معناه ان لو بيحبنى يستغنى بى عن كل الناس
دا حب خانق ..و الشخص الى كدة شخص خنيق
الحب يتجدد مع الاحساس بالحرية للطرفين ...
و مع الكثير من الاستقلالية لكل منهما ..علشان مايزهقوش من بعض
ويبقى فيه دايما شوق و لهفة لبع
الأنانية
أنا عايز كذا
اعمليلى كذا
هاتيلى كذا
انا محتاجة كذا
تركيز التفكير الدائم على احتياجاتى و رغباتى و طلباتى دون احتياجات و طلبات و رغبات الآخر تقتل الحب مع الوقت
قبل ما تطالب الآخر بحاجة من احتياجاتك اسأل نفسك طب هو لسة محتاج ايه انا معملتهاش ؟
عايز ايه نفسه فيه ؟
بيتمنى ايه انى اعمله ليه ؟
بناء الجدار
فيه موضوعات حساسة ..كل ما نتكلم فيها نتخانق و تحصل مشكلة
فبنفضل دايما تجنبها و عدم الكلام فيها
لحد ما نوصل لدرجة اننا مش عارفين نتكلم مع بعض فى حاجة لان اى كلام بيؤدى الى خناقة
لازم نتعلم ازاى نتكلم مع التانى بمنتهى الاحترام و نستمع ليه بمنتهى الاحترام برده
الروتين
تمر الايام و هى كلها زى بعض ..نفس الروتين اليومى
تيجى الاجازة الاسبوعية بنقضيها فى البيت بنفس الروتين
تيجى الاجازة السنوية نفس المكان و نفس الوشوش و نفس الروتين السنوى
الحب طاقة ...و الطاقة لازم تتجدد و الا ستنفذ او تستهلك أو تتحول الى شكل آخر من الخناق و الزعيق
و التغيير و التجديد يجدد المشاعر
الخروج للطبيعة بعيدا عن التليفزيون و الاحداث ووسائل التواصل
و قضاء وقت ظريف مع بعض لوحدكم يجدد المشاعر و يشعل الذكريات
و يطهر الروح و ينقى القلب
الملل يقتل الحب
المقارنة :
دى امى بتطبخ احسن منك
دا اخويا بيعمل لمراته كذا
دا حبيبى الاولانى كان بيعملى كذا
دى حبيبتى الاولانية كانت بتعمل كذا
دا فلان مراته بتعمل له كذا
دى فلانة جوزها بيعمل لها كذا
المقارنة حتى لو شغالة جوة عقلك قاتلة للحب
كل انسان له تميزه و خصوصيته وشخصيته ..و محدش هيبقى زى حد
وزى ما الحب القديم كان له مميزات فكان فيه عيوب برده
و لو لقيت نفسك بتدور على حبك القديم على الفيس بوك ..يبقى بتدور على مفتاح فشل علاقتك الحالية
السيطرة
انت ما تعملش كدة تانى
انت لازم تعمل كذا
انا مش عايزك تعملى كذا
انا مش عايزة الموضوع دا يتكرر تانى
الرغبة فى السيطرة على تصرفات الآخر بتحسسه بعدم الأمان
و انه لو غلط و تصرف التصرف دا تانى حتى بالخطأ او النسيان هتحصل مشكلة
و يمكن تولد العند من الآخر و رفض للسيطرة دى
قل : انا اتمنى انك ماتعملش كدة تانى
انا اتمنى لما يحصل كذا ..انك تعمل كذا ..
بصيغة الطلب و ليس الامر
لما بتعبر عن نفسك و امنيتك غير لما تفرض عليه افعل و لا تفعل
التوقعات العالية والعشم
انا كنت متوقع منك انك تعمل كذا
كنت فاكر انك هتعمل كذا
كان عشمى فيك انك تعمل كذا
الاكثار من هذا الأمر بيحسس الآخر انه فاشل و انه مش على مستوى توقعاتك و بيحسسه دايما انك مش راضى عن اى حاجة هو بيعملها
توقعاتك دى أفكار فى مخك انت
لاتحاسب الناس عليها
علشان كونها فى مخك ..مش معنى كدة انها لازم تكون فى مخ الناس
النقد
انت انانى ..انت بخيل ..انت قاسى
انتى نكدية ..انتى مغرورة ...انتى غبية
اصدار احكام عامة على الآخر يقتل الحب
بدل من ذلك اعرب عن ضيقك من التصرف او السلوك الى ضايقك فقط
انا اتضايقت لما حصل كذا
بدون اصدار احكام عامة و انتقاد للشخصية
انتقد التصرف و لا تنتقد الشخصية لانه امر مهين
سوء الظن :
أيوة انت بتعمل كذا علشان كذا
محاولة البحث عن سوء النية و الدافع فى أى تصرف بيتصرفه
توقف عن ذلك تماما
و استمع و تفهم قبل أن تصدر حكمك عليه
ليست هناك تعليقات:
إرسال تعليق