الطفل يرتكب تصرف خاطىء
أو يقصر فى مهمة من مهماته
فاحنا نعاقبه
العقاب مجبش نتيجة !!!!!
نقوم نعاقبه مرة تانية بنفس الأسلوب
مجابش نتيجة
نعاقبة مرة تالتة بنفس الطريقة
و نعد نشتكى ابنى لايتغير
عزيزى المربى (الأب /الأم)
اولا : ازاى تقدر تعرف ان الوسيلة دى ناجحة و الا لأ ؟
بمعدل الانجاز و ليس النجاح الكامل
يعنى لو الطفل بيضرب اخوه بمعدل خمس مرات يوميا
و أنا عاقبته
و بدأ يضربه تلات مرات بس ...يبقى دا انجاز و دا دليل ان وسيلة العقاب ناجحة و هستمر فيها
لكن لو مجابتش نتيجة خالص ...
أو لقيت ان معدل الضرب زاد ...يبقى لازم أغير الوسيلة
انظر دوما الى معدل الانجاز
ثانيا : لازم أحاول أفهم أسباب السلوك و أحاول اتجنبها مع العقاب
يعنى لو الضرب بسبب الغيرة ...
يبقى هحاول اتجنب اسباب الغيرة
بانى اهتم بيه و اخصص ليه وقت اكبر
أزود معدلات المدح و الاشادة بيه لاى انجازاو مجهود بيعمله
أبطل اقارنه باخوه
احاول اخليه يشارك فى المسئولية عن الصغير علشان احسسه انه ليس ند ليه بل هو مسئول معايا عنه
لو أنا بعاقب و الأسباب زى ماهى ما اتغيرتش ...
مش هيجيب نتيجة
ثالثا: لازم استمر فى الاقناع العقلى للطفل ...
وفى تحريك مشاعره بالحب او الكره للسلوك ...
و التدريب لو حاجة محتاجة مهارة
يعنى ازاى اخليه يعبر عن نفسه بالكلام بدل ما يعبر بالصراخ و الارتماء فى الارض و الدبدبة و الخبط على الحيط ..دا محتاج تدريب بالراحة
رابعا: لازم تعرف ان مش علشان وسيلة ناجحة مع طفل هتكون ناجحة مع طفل تانى ..كل طفل شخصية منفصلة
ووسائل العقاب متعددة و متنوعة تبدأ بالنظرة المحدقة (التبريق ) و تنتهى بالضرب (غير المبرح )
خامسا: مش علشان العقاب مانفعش يبقى الولد مفيش فايدة فيه ....جرب وسيلة تانية
ليست هناك تعليقات:
إرسال تعليق