الأب الغائب

قال : بعد زواج استمر عشرون عاما عشت فيها فى الغربة بعيدا عن أسرتى أغلب الوقت أصبح كل تعامل زوجتى و أولادى معى كتعاملهم مع كارت ATM فهل من حقى أن أبدأ حياة جديدة ؟

أخى الفاضل :

قرار انك تبدأ حياة جديدة دا قرار حضرتك لازم تكون عارف و فاهم تبعاته

بس بصراحة و مع كل احترامى لحضرتك
وصول العلاقة بين الأب و اسرته الى هذه الدرجة مسئولية الأب فى الأساس

و للاسف الأب الغائب بيبقى كل همه توفير الفلوس بس لكنه بيبقى بعيد أوى عاطفيا و نفسيا و عقليا عن ولاده
الاولاد خلاص بيتعودوا على غيابه و لا يشعروا بحاجتهم ليه الا لتوفير المال
و دور الاب ليس مجرد توفير المال
الاب عليه واجبات نفسية و عاطفية و تربوية تجاه اولاده
و للاسف أغلب الآباء مش بيحاول يقرب من اسرته عاطفيا و لا بيحاول يتودد اليهم و لا يهتم و لا يراعى و لا يسمع منهم و لا يهتم بمشاكلهم ولا حتى بيعد يتكلم معاهم ولا بيخرج معاهم و لا بيبنى اى علاقة بينه و بين اولاده
فالعلاقة بتكون سطحية جدا علاقة مادية بالاساس مش بيكلموه الا لما يكونوا عايزين فلوس
و دى اساسا غلطة الاب
لما الاب بيكون حنون و قريب من قلب اولاده وقريب من أفكارهم و عايش معاهم حياتهم و بيشاركهم مشاكلهم و بيساعدهم بالمشورة او بالحل و واقف جنبهم لو تعبوا او حزنوا و يشاركهم فرحتهم لو فرحوا أب فعلا عايش حياة أولاده بيجنى حب و احترام لما بيكبر و لما يكون هو محتاج فعلا ليهم

حتى لو كانت زوجتك قاسية او علاقتك بيها متوترة فما ذنب الاولاد ؟

للاسف رجال كتير بيوصلوا للمرحلة دى حتى لو كان عايش معاهم
و بيحس انه خلاص مجرد بنك محدش بيحبه و لا حد بيحترمه و دا بيدفعه الى البحث عن حياة جديدة لما يوصل لمنتصف العمر للبحث عن الحب

انا رأيى ان الجهد الى هتبذله فى حياة جديدة ابذله مع زوجتك و اولادك الاول
حاول تقرب منهم حتى لو كنت بعيد ..وسائل التواصل دلوقت ممكن تخلى الاب عايش مع ولاده طول اليوم بالصوت و الصورة لو هو عايز

لما تنزل اجازات حاول تعيش معاهم مش بالتعليمات و التوجيهات و الانتقادات و الصراخ
اسمعهم حتى لو شايفهم غلط ..حول تفهمهم
اخرج مع بنتك لوحدها و اسمعها و اعتذر عن اى تقصير بدر منك قبل كدة و حاول تكسب صداقتها ..حسسها بحبك
اخرج مع ابنك لوحده و خليه يحكيلك عن حياته و اصحابه و احلامه و شجعه و حفزه
اخرج مع زوجتك لوحدها و اسمعها و اسمع آلمها و احزانها و ازاى اتحملت المسئولية فى غيابك و ثقل هذا الامر عليها و اشكرها و اشعرها انك حاسس بيها
خرجهم و فسحهم فى اماكن بيحبوها
شوف ايه ممكن يسعدهم و حاول تسعدهم
احكيلهم عن حياتك و حاول توضح لهم وجهة نظرك بدون هجوم عليهم و اعتذر عن تقصيرك فى التواصل معاهم

التقارب الى هتعمله فى بناء علاقة جديدة مع زوجة جديدة حاول تعمله مع زوجتك و اولادك الاول

ادى لنفسك فرصة سنة مثلا تحاول تستعيد اسرتك مش بالفلوس
بالحب و الاهتمام و الرعاية و محاولة تحمل كلامهم و انتقاداتهم و اثبات انها كانت خاطئة حاول تغير فكرتهم عنك و انك فعلا أب حنون و عطوف و محب
احيى فى قلبك حبهم و عبر عن حبك و حنانك ليهم
قل لهم انك محتاج حبهم وانك حاسس انك مجرد بنك و اعتذر عن تقصيرك فى بناء علاقة حلوة معاهم
قل لهم صراحة انا عايزة اصلح العلاقة المحطمة و عايز اقرب ليكم و اسعدكم ..ساعدونى

للاسف الرجل بيبقى عنده انكار رهيب من جواه لاحتياجه لزوجته و اولاده
و خاصة فى سن حضرتك و احتياجه للحب و الاهتمام و الرعاية
و انكار رهيب لانه السبب فى هذا الجفاء
لكن مش بيبقى فاهم ان هذا نتيجة طبيعية لاهمالهم و تجاهلهم عاطفيا فترة طويلة
و بدل ما يحاول يصلح ما اقترفه ..بيبدأ يدور على حب جديد و حياة جديدة

مع انه ممكن فى حياته الجديدة يصل لنفس النتيجة لو ماصلحش هو أصلا نفسه و ساعتها برده مش بيعترف بغلطه و يقول كل الستات مقرفين

وقد تنجح فى حياتك الجديدة ان كان اختيارك موفق و ليس اختيار مراهقين كما يحدث فى أزمة منتصف العمر و ان صلحت نفسك مع التجربة الجديدة

و لكنك ستدرك ساعتها كم كنت مقصر على اسرتك و لن ترتاح ابدا من احساسك بالذنب بتقصيرك نفسيا و عاطفيا معاهم

اعط لنفسك فرصة استعادة اسرتك قبل ما تدور على حياة جديدة و تفقدهم للأبد