الصديق الى طول النهار حاطت نفسه فى مقارنة معاك
تجيب درجة وحشة فى الامتحان يقولك ازاى دا الامتحان كان سهل أوى
تشترى حاجة و فرحان بيها يقولك انا اشتريت حاجة أجمل و أرخص بكتير
تتفسح فى مكان و تكون مبسوط يقولك دنا رحت المكان الفلانى أجمل و أرقى بكتير
تقوله انا ماما جابت كذا يقول انا ماما جابتلى حاجة احسن
كل كلامه علطول بيحاول يثبت لك انه أفضل و أحسن و اشياءه أفضل و اهله افضل
لو حصلك خير ماحصلش ليه ممكن تلاقيه متضايق و قرفان منك بدون سبب واضح
الصديق الى زى دا بيسمم حياتك ..ابعد عنه
فيه بأة صديق عمرك ما تشوفه و تسأله أخبارك ايه
الا لما يرد عليك بموشح من الهم و النكد و الزهق و الاكتئاب و القرف
عمره ما غلط فى يوم و يقول الحمد لله انا كويس
او عمره ما يقولك انا النهاردة فرحان او مبسوط
البنى آدم دا كمان تبعد عنه بلاد ..لانه ناقل لعدوى الكآبة و القاعدة معاه تشيلك الهم و الكرب
للأسف الناس دلوقت تعشق النميمة و الغيبة
الغيبة انك تتكلم على حد فى غيابه بشكل وحش
النميمة انه ينقل كلام الناس لبعضها
فيه شخصيات تعشق الغيبة و كل كلامها فى سيرة الناس و اسرارهم و حكاياتهم
و دول برده غاويين ينقلوا كلام الناس على بعضهم
أوعى تثق فى صديق بيحب يجيب فى سيرة الناس و يتكلم عليهم بالسوء لانه اكيد مؤكد هيتكلم عليك فى غيابك
اوعى تثق فى صديق بينقلك فلان بيقول عليك كذا او علان قال عليك كذا
لانه هينقل لهم الى انت هتقوله عليهم بالظبط
فى كمان ناس بيكونوا متخيلين ان طالما انت صديقى يبقى لازم تلبى لى كل طلباتى
مش بيحسوا بحب الآخرين الا لما يطلبوا طلبات مادية تلبى لهم
كل ما يشوفوك لازم يطلبوا طلب ومن غير اى حرج و من ضمنها الفلوس
و لو اعتذرت يتلذذوا بلومك و تأنيب ضميرك
ولو بدأت تبعد و تتأفف يبعدوا عنك و هم حاسين بالخيانة و الألم و ان معدش فيه صداقة فى الدنيا خلاص
و يبدأوا يرموا شباكهم على حد تانى
الشخصيات دى برده الى تحس انها بتستغلك و تستنزفك حاول تبعد عنها لانها بتوصلك لانك تعطى و انت محرج و مكره و متضايق
فى نوعية من الاصدقاء يكون متعلق بيك و لازق فيك
يعنى عايز يكلمك صباحا و ظهرا و مساءا و لو امكن يكون قاعد معاك و نايم فى حضنك
لو رحت مكان من غيره يزعل و عايز يكون معاك علطول
لو اشتريت حاجة و ماقلتش يزعل
لو مكانش عندك رغبة تكلمه و ترد على تليفوناته الى فى اوقات غير مناسبة يزعل
ممكن كمان يغير عليك بشدة
لو حاولت تقرب من أى حد تانى يحاول يبعده عنك و يكرهك فيه او يكرهه فيك
الشخصية دى ممكن يكون بيحبك بجد ...بس حب تملك و رغبة فى الاستحواذ عليك
دا ممكن يخرب عليك كمان علاقتك الزوجية لو حاسس بغيرة من شريك حياتك ..و بيعمل كدة بشكل لا ارادى تماما
احذر من هذه الشخصية فانها مدمرة
ليست هناك تعليقات:
إرسال تعليق