حبيبى
مش كل حاجة فى الدنيا احنا بنعملها لازم نحبها
فيه حاجة اسمها اعمال بنحبها
و حاجة اسمها مسئوليات ..
المسئوليات دى واجب علينا اننا نعملها حتى لو مش حبينها
طب ما هو انا مش بحب الطبيخ (انا بتكلم عن نفسى ) ...بس بطبخ لكم كل يوم علشان دى مسئولية انا اخترت انى اتولاها
بابا مش بيحب السوق ..بس بينزل معاي السوق علشان نشترى طلبات البيت و طلباتكم علشان دى مسئوليتنا
اختك مش بتحب النظافة ..بس لازم تنظف اودتها كل يوم قبل ما تنزل المدرسة لان دى مسئوليتها
المذاكرة دى مسئوليتك ناحية نفسك انت
لان الانسان واجب عليه يحافظ على نفسه ولا يقتلها
زى الاكل بالنسبة للجسم ..
هل علشان انت مش بتحب الاكل ماتاكلش ؟
لازم تاكل علشان جسمك يحافظ على صحته و ينمو و لا يصيبه الامراض
عقلك الغذاء بتاعه العلم و المعلومات
لو لم تغذيه ...هيموت ..خلايا مخك هتموت ..وستصاب بأمراض التفكير العديدة و لن ينمو ذكاءك
و هتكون اخرتك زى اى واحد مش متعلم
زى عم احمد البواب ..مع كل احترامنا ليه طبعا
زى عم سيد الى بيمسح العربيات ..مع كل تقديرنا لمجهوده
بالرغم من احترامنا للناس دى و اننا مانقدرش نستغنى عنهم
بس الى مش بيتعلم فى الزمن دا ..مش بيلاقى الا الاعمال دى الى مش محتاجة تعليم
انا هديلك فرصة تفكر و تختار مستقبلك
و مش هقولك ذاكر تانى
لو عايز تشتغل فى المستقبل شغلانة مش محتاجة تعليم ..يبقى دا قرارك و لا تلومنى بعد كدة
لو عايز تطلع زى فلان و الا علان فدول اتعلموا و ذاكروا و اجتهدوا
والاختيار ليك
المذاكرة مش حاجة ظريفة و لا ممتعة ..بس لازم نعملها علشان تنمية عقولنا
ممكن نظام التدريس يكون غلط ...ممكن نظام المدرسة يكون مقرف ...ممكن عمل الواجبات يكون تقيل ..
بس للاسف دا الى موجود دلوقت
ومعندناش وسيلة تانية مختلفة و محببة
طالما ماعندناش بديل تانى يبقى نيجى على نفسنا شوية و نخلص بسرعة الحاجة التقيلة دى علشان نفضى للعب و لقضاء وقت ممتع فى حاجة ظريفة بنحبها
المذاكرة مسئوليتك
و العلم واجبك نحو نفسك
وعمل الواجبات مهم لتثبيت ماتعلمته فى دماغك
و لو مش عايز كل دا انت حر
نطلعك من المدرسة و تبدأ تشتغل من دلوقت
ليست هناك تعليقات:
إرسال تعليق