مستر فلان بيشرب سجاير
و مس فلانة مش محجبة
و صحبتى فلانة بتكذب كتير اوى
و صحبتى فلانة قليلة الذوق و بتاخد حاجاتنا من غير ما تستأذن
و زميلى فى الفصل بيشتم شتايم وحشة
حبيبتى
ربنا لما بدأ الخلق خلق الملائكة ...لايعصون الله ما امرهم و يفعلون ما يؤمرون ..بيسمعوا كلام ربنا فى كل صغيرة و كبيرة
ولما خلق الانسان و الجان خلاهم مكلفيين ..يعنى عندهم عقل يفكروا ويقرروا هل هيسمعوا كلام ربنا و الا لأ
بعدين ربنا بعت لنا الانبياء و الصالحين علشان يقولولنا ربنا عايز مننا ايه علشان ينصلح حالنا فى الدنيا و الاخرة
زى بالظبط لما واحد يصنع ثلاجة و الا تليفزيون و الا كومبيوتر ..بتلاقى معاه الكتالوج الى يبين طريقة الاستخدام
و لما تخالف تعليمات التصنيع الجهاز بيبوظ بسرعة
لكن طول ما انتى ماشية على التعليمات الجهاز بيعد شغال لحد ما تنتهى صلاحيته
الحلال بين و الحرام بين ...و الصح واضح و الغلط واضح
لكن ساعات الانسان بيضعف و بيعمل حاجات غلط لاسباب كتيرة ..
اما انه مش عارف ربنا عايز منه ايه ..
اما انه عارف لكن مش مقتنع ان دا مفيد ليه
اما انه عارف و مقتنع بس مش قادر يتغير للاحسن بسبب ضعف فيه
اما انه عارف و مقتنع و قادر بس عنيد و مش عايز يصلح الغلط
و ممكن واحد ماشى صح علطول و اتعرض لموقف ضعف وقع فيه فى الغلط
الاسباب كتييييير
و الاسباب دى فى نوايا الناس و دواخلهم و مش هنقدر نحكم عليها ولا مطلوب مننا اننا نعرفها ..لكن ربنا وحده الاعلم بيها
و الرسول قال لنا ان كل ابن آدم خطاء ..و خير الخطائين التوّابون
الى بيتوبوا و يرجعوا و لايصروا على الخطأ
لكن مش كل الناس بهذه الخيرية
احنا مش هنقدر نخلى الناس كلها تمشى صح ونجبرهم على كدة ابدا
لازم نتعود و نتأقلم على ان الناس مختلفين .
و انهم بشر يخطئون و يصيبون
و مش معنى كدة اننا نكرههم و نبعد عنهم و نعد ننتقدهم و نبص لهم نظرة احتقار
بالعكس احنا ممكن نحبهم ..بس نبقى زعلانين انهم بيعملوا الغلط
و لو بنحبهم بجد هندعيلهم ..
و لو علاقتنا بيهم قوية ممكن ننصحهم بمنتهى الحب و الرفق و الذوق بيننا و بينهم
اوعى تحسى يا حبيبتى ان انتى الصح و كل الناس غلط
دايما عايزاك تحسى ان دا من فضل ربنا عليكى مش بشطارتك و ذكائك ..لما تحسى بفضل ربنا و تشكريه هيحفظك اكتر و اكتر
الاحساس بالافضلية دا مزعج جدا بيخلى بينك و بينهم دايما حاجز نفسى بيبان فى كلامك و تصرفاتك و نظراتك بشكل لا ارادى ..
و بيوصل لهم الاحساس دا دايما و يبعدهم عنك
و ممكن يدخل فى قلبك مرض العجب ..انك تنظرى للناس من منظور اعلى منهم و يحسوا انك بتحتقريهم
انتى مش افضل منهم ...دا فضل ربنا عليكى ان حفظك من الوقوع فى الغلط اولا و اخيرا
ومحدش ضامن ابدا انه يعيش طول عمره مش بيغلط
ممكن اوى الانسان يقع فى الغلط الى كان بيحتقر الناس علشانه
و ساعتها هيبقى محتاج حد يطبطب عليه و يقويه بدل ما ينتقده و يقرعه و يعنفه
حبيبتى
حبى دايما كل الناس مهما كانت غلطاتهم ..و مهما كان كرهك للغلط
الرسول صلى الله عليه و سلم كان بيعمل كدة ..
و أظهر الحب و الرفق و الرحمة لناس ارتكبوا جرائم مش مجرد غلطات
و أثر فى الناس بقلبه الكبير مش بلسانه السليط و نظراته الحادة
ولو حد ارتكب الغلط فى حقك ...اظهرى ضيقك و كلميه حتى لايكررها
حبى الناس
و خليكى متواضعة
لعل هذا يكون سبب فى تغييرهم لما يشوفوا ادامهم نموذج كويس بيحبهم
و ربنا يحفظك دايما يارب
ليست هناك تعليقات:
إرسال تعليق