قال : مراتى مهملة فى شغل البيت مع انى قعدتها من الشغل ..اعمل ايه ؟
أخى العزيز :
مش علشان هى مش بتشتغل يبقى عليها كل شغل البيت و انت مالكش دعوة بيه خالص
بدل ما تعد تنبه طول النهار على تقصيرها ...و تنتقدها ...و صراخ و زعيق .و الاطباق الى مش مغسولة فى الحوض ...و الزرار الى مش متخيط فى القميص ...و الورق الى الاطفال مقطعينه على الارض
عارف لو تمد ايدك و تعمل الحاجات دى هتريح نفسك انت الاول ..و هتوريها و تعلمها ازاى تتعمل ...
و هتحسسها انك مقدر تعبها و بتساعدها
وهى كمان هتحس فعلا بالسعادة بيك و انك حنون و عطوف و متعاون
لو مراتك طبعها نشيطة و منظمة و مرتبة ...ولقيت منها تقصير اعمله انت يا اخى دا حتى الحاجة تتبارك و الله بحطة ايدك عليها ...
دا يخليها ترضى عنك و تفرح بيك و تشوف ابتسامتها الجميلة الى من زمان ماشفتهاش
ولو هى طبعها مش منظمة و مرتبة علمها بالراحة ..قل لها الهدوم تترتب بالشكل دا ...و المطبخ يترتب بالطريقة دى ..و الاودة تترتب كدة
بدل ما تعد تزعق و تتنرفز ...وريها تتعمل ازاى ...وايدك معاها
و لو ربنا فتح عليك هات لها خدامة تساعدها
مش كل النساء عندها قدرة على الترتيب و التنظيف ..فيه نساء ماتعرفش ترتب و لا تنظف
عادى يعنى زى مافيه رجالة مابيعرفوش برده
مهو محدش بيتولد بيعرف يرتب و ينظف ...دى حاجة بنتعلمها ..و مش كل الناس عندها المهارة دى
اديها تحفيز
لو هى مادية شوية اديها مصروف شهرى ..بدل مرتب الشغالة يا اخى ...اول بدل المرتب الى كانت بتاخده فى شغلها
مش كتير عليها على سبيل التحفيز و التشجيع
ولو هى عاطفية غرقها حب و حنية واحترام و كلمات مدح و اعجاب و تشجيع ..هتلاقيها تشتغل 24 ساعة فى اليوم من غير ما تكل و لا تمل
مش الحل انك تهرب من البيت
دا اسمه جبن و هروب من مواجهة المشكلة
انت لما يبقى عندك موظف مش شغال كويس فى الشغل ..بتسيب له الشغل و تمشى و الا بتحاول معاه لحد ما يتعلم و يشتغل صح
اتعلم تشغل شريكتك فى الحياة ..بالراحة و الحب و الحنية و الهدايا
التعليم بالخرزانة دا ماينفعش ...بيخليها تكرهك
و البيت برده مش هيترتب
ليست هناك تعليقات:
إرسال تعليق