الرجل يعشق النساء و هم نقطة ضعفه الرئيسية
و كما جاء عن ربنا جل و علا الذى خلقهم و هو الاعلم بهم : ( زين للناس حب الشهوات من النساء )
و كما ورد عن رسول الله صلى الله عليه و سلم : ما تركت بعدي فتنة أضر على الرجال من النساء
يعنى لازم الست تتعامل معاه من هذا المنطلق ان الستات نقطة ضعفه يعنى كأنه طفل صغير عنده ولع باللعب مع الستات
فيه راجل بينضج و يقدر يهذب هذه الخصلة .....و راجل لأ
الرجل ايضا محب و عاشق للمغامرات و التحديات واحساسه انه لازال يجذب النساء
و انه يقوم بمغامرة نسائية ليثبت ذلك احساس ممتع بالنسبة ليه للاسف و خاصة لو حاسس دايما بالرفض من مراته
كان الراجل علشان يلبخ زمان كان صعب...
كان بيعمل زى سى السيد و يروح بيت دعارة و بيبقى خايف من الفضايح
دلوقت بيت الدعارة ماسكه فى ايده على شكل موبايل ...و بيعمل فيه الى هو عايزه ...من نظرات و كلمات و صور و ممكن تواصل عبر الفيديو ...ولا من شاف و لا من درى
و هو قاعد فى البيت يعنى مراته لا بتقوله رايح فين و لا جاى منين الموضوع بأة سهل جدا جدا ...و ميسر ...
وهو ضعيف جدا امام الاغراءات
مش معنى كلامى انى بدى مبررات للرجل ...بس بقول للستات على نفسية الرجل
و كيف ينظر الى هذا الامر علشان نقدر نفهم هذا الكائن الغريب الظالم لنفسه و لغيره
و علشان نقدر نساعد اولادنا الصبيان على النضج المبكر و التحكم بالعقل فى هذه الغريزة
تعريف الرجل للخيانة هى العلاقة الجنسية تحديدا مع المرأة اى هى الزنا الصريح ..
و ما سوى ذلك فهو اى حاجة تانية.....
تسالى بدل أزأزة اللب كدة
هواية زى التسوق و الفرجة على الفاترينات
و نصيحتى لكى سيدتى :
لاتفقدى ابدا الثقة فى نفسك ..اوعى تحسى انك السبب ..فالعدوى بتتنقل حتى لو متزوج ملكة جمال معتنية بنفسها ..قد يكون من الاسهل نقلها بسبب فقدان المناعة ...بس دا لايمنع من العدوى لو الفيروس شرس ( الستات الى بيجروا وراه )
كل ما عليك فعله ان تعتنى بجمالك و قوامك و شياكتك من اجل نفسك انت ..من اجل ان تستعيدى ثقتك فى نفسك ...من اجل ان تشعرى انك و ان رفضك احدهم
فالعشرات غيره يريدونك ..العيب مش فيك دى نقطة مهمة جدا
ثانيا : حاولى ما تخليش الموضوع دا سبب مزمن للنكد ( انا عارفة انه صعب )
ابعدى تماما عن موبايل زوجك و عن اللاب و ماتخليش فضولك يقودك الى عكننة نفسك المستمرة ...الى مالهاش لازمة الا عكننتك انت و بس ..
صحتك بالدنيا يا حبيبتى
و لو انت متاكدة من ان قاعدته على الموبايل هى مع واحده تانية ...و قاعدى تهرى و تنكتى فى نفسك طول ماهو قاعد
حاولى تشغلى نفسك باى حاجة تخليك ما تفكريش عارفة انه صعب ..بس حاولى
لازم يكون ليكى اهتمامات فى حياتك غير زوجك و اولادك علشان لو وقعت منك جئية تلاقى حاجة تانية تحسى فيها بالنجاح و السعادة
ثالثا : لو قدرتى ..و دا صعب مع وجود اطفال انا عارفة ...لو قدرت انك تجذبيه ...بالقاعدة معاه ...بالخروج مع بعض ...باى نشاط ممتع ليكم انتم الاتنين حاولى ..حاولى علشان سعادتك انت ...و علشان تحسى بوجوده معاك
فيه رجالة بتكون كويسة جدا مع زوجاتها فعلا ...و باسطين زوجاتهم كلام حلو وفسح و عاملين لهم اشباع نفسى و عاطفى رائع ..ولما تواجهه يعتذر و يتأسف و يندم و بعدين يرجع تانى
و دول الرجالىة الى ستاتهم بتصبر شوية و بتلاقى حاجة حلوة ممكن تستحمل علشانها غير الرجالة الى مهملين زوجاتهم تماما
رابعا : لو فعلا وصلت لدرجة من الايذاء النفسى من اهماله الشديد ليكى ..و عدم تحملك هذا الامر فلامانع من الطلاق او الخلع .......ماتحمليش نفسك فوق طاقتها ....فيه ستات بتعد تتحمل لحد ما تصاب بالاكتئاب المرضى ...لو حاسة ان حياتك من غيره هتكون اجمل و اسعد ...ما تضغطيش على نفسك .....صحتك بالدنيا
خامسا : الرجالة ساعات بتتحسن بالصدمات ..و بقول ساعات
يعنى طلب الطلاق و احساسه ان بيته هيتهد ...لو بيحبك و متعلق بيك و مش عايز فعلا يفقدك ..ممكن يتحسن ....
بس دا لايمنع انه ممكن يرجع تانى للعلم برده لكن لو الموضوع وصل الى درجة الادمان فعلا مع نكد مستمر فى البيت فممكن يطلق و يقولك بالسلامة و القلب داعيلك
و نصيحتى الى الرجل :
الراجل الى مشبع مراته عاطفيا و نفسيا ...دا بيديها دافع انها تصبر و تستحمل بتلاقى حاجة حلوة ممكن تستحمل علشانها لكن لو مهملها تماما ...بتكون مقاومتها أقل و بتفقد قدرتها على التحمل تماما
و فى هذا الزمن زى ماحضرتك قاعد على النت ..هى كمان قاعدة عليه
وزى ماحضرتك بتفتن هى كمان بتفتن من اى واحد بيعمل لايك او كومنت اعجاب او ممكن يكلمها على الشات
و فيه ستات بتكون مخنوقة و ضعيفة و بتفضفض مع اى حد يبدى اى قدر من الاهتمام
و فيه ستات بيبقى عندها رغبة داخلية فى الانتقام و ممكن تخون انتقاما منك و على رأى وردة (جرب نار الغيرة )
مصايب الستات المتزوجات الى بتحب على الفيس كترت هى كمان
و لو مش بتعد على الفيس فيه رجالة فى شغلها معجبين بيها و بيشتغلوا عليها
و لو قاعدة فى البيت ممكن تقع فى حب ممثل فى التليفزيون او شخصية مشهورة
ولو حاسس انها ملهية. بعيالها بس قلبها فاضى و ممكن تتخيل و تحلم زيك
و ممكن تفتكر حب قديم و تتحسر عليه
ووممكن تتخيل واحد تعيش معاه فى خيالها
ماتبقاش مطمن اوى يعنى....
و الى بتعمله مع بنات الناس اؤكد ليك تماما هيتعمل مع مراتك و بناتك فى المستقبل
عارف حكاية ..و لو زدنا لزاد السقا
دور عليها و انت تعرفها
ليست هناك تعليقات:
إرسال تعليق