قال : زوجتى تتهمنى دوما أنى ظالم و أن ما اتعرض له من الظلم فى عملى و حياتى بسبب ظلمى لها ويؤلمنى هذا كثيرا لانى لا أشعر انى أظلمها
أخى الفاضل :
قد تكون زوجتك بالفعل غير محقة و هذا وارد
فيه شخصيات حاسة دايما انها ضحية و مظلومة و الدنيا كلها تتآمر عليها و دى شخصيات يصعب جدا ارضاءها
و لكنى سأحاول أن أضع لك ميزان تقيس عليه تصرفاتك معها هل هى ظالمة و الا لأ
الظلم عكس العدل
و العدل فى الحياة الزوجية قد يعنى المساواة فى الحقوق و الواجبات
و الانصاف فى توزيع المهمات و المسئوليات
زى الشغل كدة ..انت و زميلك متساوون فى العقوبات و الترقيات و المرتب و الواجبات و القانون الذى يفرضه نظام العمل و قوانينه
لكن كل واحد فيكم مكلف بعمل مختلف فى حدود امكاناته
يعنى لو حضرتك فارض عليها انها تعمل كذا و ماتعملش كذا و عاطى لنفسك الحق دا يبقى انت كدة ظالم
من حقك تخرج من اصحابك فى اى وقت و دا مش من حقها
من حقك تروح لأهلك فى اى وقت و دا مش من حقها
من حقك تسافر تتفسح فى اى وقت و دا مش من حقها
من حقك تصرف فلوسك براحتك و دا مش من حقها
للاسف المجتمع رسخ الكثير من الظلم و عدم المساواة بين الرجل و المرأة فى الكثير من الحقوق و الواجبات
واجب عليها تخدم والدتك و انت مش واجب عليك تخدم امها
واجب عليها تجامل أهلك و اصدقاءك فى المناسبات و انت مش واجب عليك دا
واجب عليها تستقبل ضيوفك و تعزمهم و تكرمهم و مش واجب عليك دا
قبل ما تفرض عليها واجبات و ترفض ليها حقوق اسأل نفسك
: هل فيه مساواة بينى و بينها ...و الا انا فى مخى دايما قناعة الراجل غير الست
فى الحقوق والواجبات ربنا ساوى بين الراجل و الست و لم يفرق بينهما نهائى
و القوامة هى درجة مسئولية ..يعنى مهمات زيادة ..و ليست درجة تتيح لك التسلط و الظلم
العدل ايضا هو توزيع المسئوليات و المهام بشكل عادل يرضيها
ربنا مقالش انها تشيلك و البيت و العيال وشغلها و انت شايل شغلك بس
دا ظلم برده
انك تحمل واحد أغلب المسئوليات علشان انت مش بتعرف تعملها ..و علشان شفت والدتك بتعملها وكانت مظلومة ..دا ظلم بين
العدل أيضا فى الحقوق النفسية و العاطفية
زى ماعايز حب و حنية هى كمان عايزة حب و حنية
زى ما عايز دلع و منظر جميل هى كمان عايزة دلع و شكل جميل
زى ما عايز ها تسمعك و تحتويك هى كمان عايزة حد يسمعها و يحتويها
عزيزى قبل ما تطالبها و تتهمها بالتقصير فى جانب ما اسأل نفسك هل أنا بقوم بالموضوع دا و الا لأ
هذا هو العدل الى ربنا أمر بيه
و كثير منا لايشعر بظلمه لشريك حياته
و كثير من النساء ظالمة ايضا لأزواجها و تطالبه بما لا تقدمه و تفرض عليه ما لا يفرض عليها
و الظلم وصل لابنائنا أيضا ...
و علشان كدة ربنا بيبتلينا بيه ممن يتولى أمرنا و بيسلط علينا من لايخاف الله فينا و لا يرحمنا
و صدق ربنا
( إِنَّ اللَّهَ لَا يَظْلِم النَّاسَ شَيْئًا وَلَكِنَّ النَّاسَ أَنْفُسَهُمْ يَظْلِمُونَ )
ربنا ليس بظالم ..و لكنه يسلط الناس بعضهم على بعض لعلهم يرجعون
ليست هناك تعليقات:
إرسال تعليق