قال : حضرتك بتقولى ان أحد أسرار السعادة الزوجية تقبل الآخر و احترام اختلافى عنه .ممكن تقوليلى أعمل كدة ازاى و احنا بسبب الاختلاف دا كل يوم بنتخانق ؟
عزيزى :
احنا بنتخانق مش علشان احنا مختلفين
احنا بنتخانق علشان كل واحد شايف نفسه هو الى صح و التانى غلط و لازم يمشى رأيه على التانى
أو علشان اسلوبنا فى الحوار و المناقشة غير راقى و مهين
هضرب لك مثال من حياتك :
انت انسان اجتماعى
بتحب يكون ليك علاقات كتيرة ..بتحب التجمعات الاسرية و العزايم و الرحلات و الحفلات
و مراتك تميل الى الانطوائية ..و مش بترتاح فى التجمعات دى
المشكلة بتحصل انكم انتم الاتنين رافضين بعض
هى شايفاك انك منفتح زيادة عن اللزوم و انت فارض عليها انها لازم تحضر التجمعات دى عشان خاطر اهلك و اصحابك و الى بتسبب ليها ضغط نفسى كبير و كل خروجة تعمل لك مشكلة ..انت سايبنى و رايح تقف مع اصحابك ..انت بتتريق على ادام الناس ..انت ازاى تهزر مع فلانة بالشكل دا ..انت بتعاملنى و لا كأنى موجودة ...انت ..انت ..انت
و انت شايفها انها وحشة و مش بتحب الناس و خانقاك و عايزاك لازق فيها و ما تتحركش من جنبها و نكدية
لو احترمتوا الاختلافات الى بينكم
و ادركتم ان مفيش حد صح و حد غلط
انتوا عامين زى الموزة و التفاحة ...محدش بيقول للموزة انتى طويلة و هبلة و لا حد بيقول للتفاحة انتى قصيرة و مكببة و قزعة ..
هو ربنا خلقهم مختلفين كدة
يبقى هنعرف اننا مختلفين
و نحاول نقرأ عن الفرق بين الشخصية الاجتماعية و الشخصية الانغلاقية
و هنلاقى ان الصفات عند كل الناس الى بيحملوا السمة دى
و هنتعامل مع الاختلاف دا بالعقل
هنحترم رغبة المنغلق فى انه مش بيحب التجمعات دى كتير و يوم ما نطلع معاه نحاول نكون جنبه علطول علشان نزيل التوتر بتاعه
و المنغلق يسيب المنفتح براحته يطلع التجمعات دى لوحده من غير ما ننكد عليه انت ازاى تسيبنى
كل واحد هيبقى براحته ..محدش يفرض على التانى طباعه
و لو طلع المنغلق لتجمع كبير هيراعوا هم الاتنين مشاعر بعض
يعنى المنفتح يحاول يكون جنبه أغلب الوقت و يراعى توتره
و المنغلق يعذره فى رغبته فى الانطلاق و الانفتاح على الناس و يراعى طباعه
التقبل مهارة ..محتاجة تدريب عقلك المستمر و برمجته
شريك حياتى مش وحش ..هو مختلف
مش من حقى أفرض عليه طبعى ...و لا هو من حقه يفرض على طبعه
و يوم ما تضطرنا الظروف الى قرار مشترك ..
هنراعى اختلافاتنا من غير مانعمل مشاكل
الوعى بالاختلاف
و العلم بالطبيعة الشخصية المختلفة
و مراعاة مشاعر بعض فى المواقف الى بيظهر فيها الاختلاف
بيخلى الحياة أسهل و أجمل بكتير
ليست هناك تعليقات:
إرسال تعليق