سؤال سألته لى ابنتى المراهقة فقلت :
لا يا حبيبتى الحب مشاعر رائعة ..لما بيملأ القلب بيلاقى سعادته و هناه و راحته
ربنا خلا علاقة الحب بيننا و بينه سبحانه و تعالى من أسمى و أرقى العلاقات لما قال :والذين آمنوا أشد حبا لله
و قال : فسوف يأتي الله بقوم يحبهم ويحبونه
و الرسول صلى الله عليه وسلم قال لنا ان اسمى علاقة ممكن تربط بين اتنين هى علاقة الحب و جعلهما من الذين يظلهم الله تحت ظل عرشه يوم لا ظل الا ظله لما تقرب الشمس من الارض و يغرق الناس فى عرقهم ( رجلان تحابا فى الله اجتمعا عليه و تفرقا عليه )
و قال لنا ان لهم منابر من نور يغبطهم عليها الانبياء و الشهدء
و الرسول صلى الله عليه و سلم قال لنا كمان ان الانسان مش هيدوق حلاوة الايمان الا لو عمر قلبه الحب لله و لرسوله و للناس
(ثلاث من كن فيه وجد حلاوة الإيمان : أن يكون الله ورسوله أحب إليه مما سواهما , وأن يحب المرء لا يحبه إلا لله , وأن يكره أن يعود في الكفر كما يكره أن يلقى في النار )
و الحب بين الرجل و المرأة من أجمل مافى الدنيا ربنا جعله آية من آياته (ومن آياته أن خلق لكم من أنفسكم أزواجا لتسكنوا إليها وجعل بينكم مودة ورحمة)
بس لاحظى كدة الآية قالت ايه ...أزواجا
يعنى الحب الرائع الممتع بين الولد و البنت هو الحب بين الازواج
المشكلة لما بيحصل حب بين بنت وولد من غير زواج بيحصل حرام كتير بينهم ..و هو دا الحرام فى الحب
الحب نفسه حبيبتى مشاعر ممكن تحصل غصب عننا لكن المشكلة انها ممكن تجرنا للحرام
ممكن يبصوا لبعض نظرات غلط و ربنا أمرنا بغض البصر
ممكن يقولوا لبعض كلام مايصحش يتقال
ممكن يلمسوا بعض ..يحضنوا بعض ..يبوسوا بعض زى ما بتشوفى فى الافلام
ممكن قوة الانجذاب بينهم تؤدى الى الزنا يعنى علاقة جنسية من غير جواز
ودا طبعا كله غلط و حرام طالما لسة مش متجوزين
حبيبتى :
كلنا فى مرحلة من حياتنا فى فترة المراهقة اعجبنا بشاب ما ..
ابن الجيران ..او زميل الدراسة او ممثل او مطرب او شخصية مشهورة
و دا طبيعى و بيحصل لاى بنت فى فترة المراهقة
دا انجاب طبيعى جدا بين الولد و البنت بسبب البلوغ و التغيرات الهرمونية الى بتحصل للجنسين فى السن دا
بس البنت العاقلة هى الى بتتحكم فى تصرفاتها و تعرف تسيطر على مشاعرها دى بحيث ماتجرهاش للغلط و الحرام
انا عارفة ان ربنا ابتلاك بزمن صعب ...اصبحت العلاقات دى عادية بين الولاد و البنات ..بس مش علشان هى منتشرة و عادية تبقى مش غلط
و مش علشان بيبقى عندك رغبة فى التجربة اننا نجرب
يعنى ماكل واحد عنده رغبة انه يطير ..هل معنى كدة اننا ننط من البلكونة
كل واحد عندنا رغبة اننا نغطس زى السمك ..نقوم نرمى نفسنا فى البحر
قوتك و قوة عقلك و شخصيتك بتتحدد بقدرتك على التحكم فى الرغبات دى و من ضمنها رغبتنا فى اقامة علاقة مع ولد
لان الى بيطير او يغطس بيكون مجنون
والى بينجرف ورا رغباته من غير عقل برده بيبقى عقله صغير و بيعانى دايما فى حياته من الصدمات و الحرام
الغلط و الصح احنا بناخده من ربنا الى خلقنا و هو الأعلم بينا و بما يصلحنا و الرسول قال لنا الحب خطره كبير و ممكن يضرنا
إن الله كتب على ابن ءادم حظه من الزنا أدرك ذلك لا محالة فالعين تزني وزناها النظر واليد تزني وزناها اللمس والرجل تزني وزناها الخطى واللسان يزني وزناها المنطق والفم يزني وزناه القبل والنفس تمنى وتشتهي والفرج يصدق ذلك أو يكذبه".
و بناخد الصح و الغلط كمان من العلماء الى قالولنا ان الحب فى فترة المراهقة دا مش حب بقدر ماهو انجذاب غريزى و تعلق
و سموه الحب الاحمق لانه يعتمد على الغريزة بس دون العقل و المشاعر
و قالولنا ان دا خطر لانه يؤدى دايما للحرام بسبب قوة الغريزة فيه الى مش بتحكمه العقل
حبيبتى :
صونى دايما قلبك و احفظيه للى يستاهله و هيكون شريك حياتك
لانك انتى فى النهاية الى بتتعذبى ..
بتتعذبى بسبب صراعك بين قلبك الى فاكر انه بيحب و جسمك الى بينجذب من ناحية
و عقلك و ضميرك و خوفك من ربنا من ناحية تانية
خلى بالك يا بنتى من قلبك
و لو حسيتى بأى حاجة تجاه اى حد قوليلى ..انا مش هزعل منك ...هساعدك ازاى تنسى الموضوع دا و تتحكمى فيه بعقلك
و ربنا يحفظك يارب
ليست هناك تعليقات:
إرسال تعليق