تصدر من الزوج تصرفات او كلمات بتضايق زوجته
فتعبر عما يضايقها لزوجها بمنتهى الوضوح
فهو يسمع الكلام و لا كأنه اتقال و يعيش حياته عادى جدا
ممكن يكون السبب هو قناعات ذكورية قبيحة راسخة فى مجتمعاتنا
ان الست لازم تطبع بطباع جوزها و لازم تتعود على قرفه
بس فيه فرق بين انها تطبع بطباعك يعنى انها تكون زيك و دا مستحيل
أو انها تقبل طباعك المختلفة وتحاول تتكيف معاها و دا ممكن
و بين انها تقبل مايؤذيها و يؤلمها و دا مستحيل
او عنده قناعة انا حر ..انا راجل و اعمل الى انا عايزه ..هى مش هتتحكم فىّ
او فاكر انه لو استجاب هتركبه و تسيطر عليه
ودا انسان ضعيف للأسف و بيحاول يعوض ضعفه بالعند و الكبر حتى لو مقتنع انه غلط فيها
و ممكن يكون هو مش بيحبها اصلا و مش بيحاول يرضيها
لأنه شخصية انانية مش بيفكر الا فى نفسه بس و رغباته و عمره مافكر فيها
هو بس متجوز واحدة تخدمه و تراعيه مالهاش الحق انها تكون سعيدة معاه
و ممكن جدا تكون هى السبب ...
ممكن تكون فعلا هى شخصية مسيطرة و عايزة تغيره على مزاجها و تأيفه على حسب الصورة المثالية الى فى خيالها
ممكن يكون اسلوبها سىء بتخليه يعند و دول الاكثرية الطافحة للاسف أغلب النساء لا تنتبه لاسلوبها فى النقد او العتاب
ممكن تكون بتنبه لحاجات كتيرة اوى وبتتعامل معاه كطفل عايز يتربى
فهو حاسس انه فقد الامل خلاص انه يرضيها لان كل تصرفاته مش عاجباها
و ممكن يكون هى كمان بتؤذيه ببعض التصرفات و هى مش عايزة تبطل فبيعاملها بالمثل
طب نعمل ايه ؟
سيدتى :
اكتبى لستة بكل الحاجات الى مش عاجباكى فى جوزك لانها مضرة بيكى (مش علشان هى مختلفة عنك ) و نفسك تتغير
فرق كبير اوى بين الحاجة المضرة نفسيا زى مثلا الاهانة او التجاهل او الخيانة او الفقر وعدم الطموح
و بين انه يكون مثلا مش منظم او طموح اوى و كل تركيزه فى شغله او انه عملى اوى
رتبيهم من الاكثر ضررا الى الاقل ضررا بالنسبة ليكى
و ركزى على حاجة واحدة بس ..الاكثر ضررا ....
و نحاول ننوع فى الاساليب المباشرة و غير المباشرة مع الدعاء الى الله تعالى حتى يبدر اى تحسن مهما كان طفيف
امدحيه و اشكريه و حسسيه انك سعيدة بهذا التغيير الطفيف علشان يتشجع انه يستمر
المهم تبدئى بنفسك و تحاولى انتى تغيرى فى نفسك الحاجات الى هو بيتضايق منها و تقوليله انا بعمل كذا او مش بعمل كذا علشان خاطرك ..
فهميه واخديه باله لانه ممكن مايكون بياخد باله
و انت سيدى :
اصرارك على اضرارها بيخلى الغلطات الصغيرة تكبر
فالصغيرة مع الاصرار بتتحول لكبيرة
و كونك مش مقتنع ان افعالك مضره ليها ...دا لايعنى انها غير مضرة
يعنى لما تقول فيها ايه يعنى لما ارفض رغباتها و هى لازم تسمع كلمى .
.مش معنى انها بتسمع الكلام انها مش مضرورة و من جواها تعبانة و هتنفجر
كونك مش مقنع بالتغيير ..و عايز تعودها على طبعك المؤذى ...دا لايعنى انها لاتتألم و ممكن مع الوقت يحصل انفجار..و مستحيل هتقدر تسعدك طول ماهى شايلة و مليانة
زى واحد مش مقتنع باهمية تغيير زيت العربية ...ومش بيغيره ...لكن دا مضر بالعربية
زى واحد مش مقتنع ان الكوتشات لازم تتغير بعد مدة ...ومش عايز يغيرها ..بس دا نذير ان ممكن تحصل مصيبة
والحاجة الى نفسى الرجال يعرفوها ان الانسانة غير السعيدة بتطلع اطفال كمان مشوهين نفسيا ..وانتوا شايفين منظر الاجيال الجديدة عاملة ازاى
انت فاكر ان الاذى واقع عليها بس ..الاذى متعدى للاولاد ...لان الى بتعمله فيها بتطلعه هى فى اولادك بشكل لا ارادى تماما
لو بتفكر فى دقايق تعمل تبادل ادوار ..و تتخيل ان هى الى بتعمل التصرف البغيض الى انت بتعمله ..و شوف احساسك هيكون ايه
ماتقلش الراجل مش زى الست ...الست بشر بنى آدم زيك بالظبط
ادام ربنا زيك بالظبط ..
و الى بتعمله فيها ..اذى مستمر ليها وظلم ليها ربنا هيحاسبك عليه
و النهاية
طول ماهى امرأة غير سعيدة ...عمرك ما هتحس بالنجاح فى حياتك و لا بالسعادة
فالسعادة الرائعة فى الحب ...و طول ما انت مؤذى ليها عمرك ماهتحس بالحب دا
و الأمر متروك اليك
ليست هناك تعليقات:
إرسال تعليق