ربنا سبحانه و تعالى خلقنا و هو الأعلم بنا و بما جبلت عليه
نفوسنا
و أعطانا حوافز للعمل الصالح (الثواب و العقاب ) (الجنة و النار )
أى إنسان فى الدنيا محتاج الاتنين علشان يحسن عمله
لكن يختلف الناس فى مدى حاجتهم الى احداها
فيه ناس تحسن عملها دافعها اكتر الرغبة فى الجنة
و فيه ناس دافعها أكتر الخوف من النار
و الأفضل منهما أن يكون الدافع حبا فى الله جل و علا
و احنا فى حياتنا كلها ننتظر الثواب و نخشى العقاب حتى فى الدنيا و دا دافع مهم لاصلاح عملنا
فاحنا بنشتغل كويس فى شغلنا رغبة فى المرتب و فى زيادته و
فى الترقية و فى التقدير الأدبى و المعنوى
و بنخاف من التقصير و الاهمال خوفاََ من العقوبات و الخصم و الطرد
و الافضل من الاتنين حبا فى النجاح و السعادة بيه
علماء نفس الطفولة بيقولوا ان فى التعامل مع الطفل و لضمان
الصحة النفسية له لابد أن يفوق الثواب العقاب
لانه لازال طفل لازم هيغلط كتير
و العقاب الكتير فى حقه بيخليه يحس بالألم و الظلم و ضعف الثقة
بالنفس و يمكن العدوان و العناد
و الثواب مش معناه الثواب المادى بالرشاوى و الهدايا ...
بالعكس
الاكثار من هذه الامور بتخليه طفل مادى و مصلحجى ما يعملش
حاجة لله ابدا
الثواب المفروض يكون بنظرات الرضا فى عيون الوالدين ..
بالابتسامة فى وشه ...بالطبطبة عليه و تقبيله و حضنه ..
بكلمات المدح و الثناء (برافو ..هايل ...ممتاز ..رائع ) ..
كلمات الثقة (انا واثق انك هتعملها ..انا متاكد انك شاطر و هتجيب
درجات كويسة ..
كلمات التشجيع ( يلا يا بطل ...انت ذكى و هتقدر ..انت ممتاز و
و أداءك هيكون هايل )
بالحديث عن انجازاته و اعماله الطيبة أدام الناس ..
بدل ما طول النهار تشتكى منه و هو بيسمع (أمر مؤذى جدا للطفل )
الثواب المعنوى بيجيب مفعول السحر مع الاطفال و بيخليهم يعرفوا السلوك الجيد و بيخلى عندهم دافع انهم يكرروه تانى علشان يرضوا بابا او ماما
و بيبنى الثقة فى نفسهم انهم اطفال صالحين و كويسين
فيه شخصيات من الآباء و الأمهات لا تتكلم الا عندما يخطىء ...
ولا ترى ابدا انه بيعمل حاجة كويسة ..
و شايفة ان اى حاجة كويسة بيعملها دا واجب عليه لايستحق المدح
و بتلاقيه كدة برده مع شريك حياته و مع الناس الى حواليه
و دى شخصية ناقدة بتكون اثرها سلبى جدا على كل الى حواليها و خاصة أولادها
لانها مش شايفة فيهم الا الوحش و دايما مكسرة مآديفهم وجايبالهم احباط لانه يصعب ارضاءها
اقعد مع نفسك و هات ورقة و قلم و اكتب مميزات كل طفل عندك
و ركز على مدح المميزات و الأفعال الطيبة أكتر من عقاب الأخطاء
و استخدم الطريقة دى على الأقل شهرين تلاتة
و شوف سلوك طفلك ازاى هيتغير للأفضل
ولا تنخدع بالطفل الهادى المؤدب الى بيسمع الكلام الضعيف الشخصية الى بينفذ كل الى انت عايزه باسلوب النقد والعقاب
دا خطورته بالظبط زى الطفل العنيد الشرس و مشاكله بتكون كتير
لما يكبر لانك حطمت شخصيته و ثقته فى نفسه بكثرة العقاب والنقد لاخطائه
ليست هناك تعليقات:
إرسال تعليق