تعلمنا كثيرا أن نتكلم ....و لم نتعلم أن نستمع
أحد المهارات المفيدة جدا لصحتك النفسية أن تتعلم كيف تستمع و تنصت الى الآخرين قلل الكلام و أكثرمن الاستماع تدخل السعادة الى قلبك و الى قلوب المحيطين بك
كثرة الكلام يكثر من أخطاء اللسان
و بتخليك تندم : أنا إيه الى خلانى قلت الكلام دا
و ممكن يزعل منك ناس كتير ..اسرار تفشيها ...كلام تنقله بدون قصد يخلى الناس تزعل من بعض ..تتكلم على حد بسوء ويتنقل ليه الكلام ....
تحرج من حاجة معينة فتضطرتكذب و يتكشف الكدب بعد كدة ...
دا غير انه يفقد الآخرين القدرة على الاستماع ليك مع الوقت ...لانهم بيزهقوا من كتر الرغى فى الفاضى و المليان ..و يفقد كلامك قيمته
كثرة الاستماع و الإنصات للآخرين بتخليك تاخد خبرات الآخرين فى الحياة و تتعلم منهم
و ياسلام لما تسمع و انت حاسس بمشاعرهم
الإنصات الى مشاعرهم و الاحساس بيهم بيخليهم يرتاحوا أوى للكلام معاك و الفضفضة و دا بيريحهم كتير ...
و بيشجعهم على الكلام لانهم حاسين انك ثقة و مش هتنشر اسرارهم
كذلك بيخلى كلماتك القليله محترمة و مسموعة ...لان كلامك بيبقى فى الصميم ..ما قل و دل و نفع
الناس محتاجة الى من يستمع اليها ...و ينصت الى مشاعرها قبل كلماتها ..و يحس بيهم و بآلامهم ...و يطبطب عليهم و يستوعب أخطاءهم ....و يساندهم على تخطيها بالكلمة الطيبة
و خاصة شريك حياتك ..رفيق عمرك ... انه فى أمس الحاجة الى صديق مؤتمن يفضفض معاه و هو مطمن ان محدش هيعرف اسراره
صديق يحتويه و يستوعب اخطاءه مش يربيه بكلمات اللوم و العتاب و التوجيه
صديق يقويه و يشجعه و يحفزه و يديله الثقة فى نفسه بالتشجيع و بث الثقة فى اوقات الضعف و ليس بالتذكير باخطاء الماضى و المعايرة
نحتاج الى الاستماع الى ابنائنا ..فقد أصابهم الملل من كتر النقد ليهم والتوجيهات و التعليمات و الاوامر و لم يعد كلامنا لهم مسموعا
ليست هناك تعليقات:
إرسال تعليق