احساسك المزمن بالقلق الشديد على أولادك من كل حاجة و من كل حد ..يسبب لك ضغط نفسى رهيب
و هو أحد أسباب التعاسة بالنسبة ليك
من أول البيبى ما يتولد و انت خايفة عليه من البكاء ..تجرى عليه اول ما يعيط و تبقى خايفة عليه اوى ..احسن يجراله حاجة من العياط ...مع ان البكاء غير مؤذى للطفل
ان كان واكل و مغير و دافىء و مفيش مشكلة
اول ما يبدأ يتحرك بالحبو او المشى بتلفى وراه فى كل مكان و كل حتة ...و مراقباه 24 ساعة فى اليوم ..مع ان الطفل محتاج اكتشاف العالم حواليه ....انت بس شيلى الحاجات الخطر من متناول يديه و سيبيه
لا تأمنى انك تسيبيه مع حد حتى لو كانت والدتك او جارتك ...فيتعود دايما على وجودك جنبه و يلزق فيك و يتعبك جدا لما ييجى يروح الحضانة
دايما خايفة انه يعمل حاجة لوحده لما يكبر شوية ...خايفة يخرج الشارع لوحده ..خايفة يقطع حاجة بالسكينة لوحده ..خايفة يكوى لنفسه لوحده ...خايفة يمسك المقص لوحده ....
لدرجة انى رأيت بعض الامهات تقلم لابنها اظافره و هو عشر سنين ..
.و تدخل مع ابنتها تشطفها بعد الحمام و هى 12 سنة ...
و لا تسمح لابنتها البالغة 15 سنة انها تدخل المطبخ نهائى خوفا عليها
من حقك تخافى على اولادك ...لكن غلط انك تقيديهم بهذا الخوف لحد ما يبقوا هم كمان خوافين و جبناء من انهم يعملوا اى حاجة لوحدهم ...
و قد يتمردوا عليك فى فترة من الفترات و يحاولوا يخوضوا فى الاخطار رغبة فى اثبات انهم قادرين على تخطيها ...
و تلاقيهم بيعملوا مصايب لانهم مش متعودين .. زيادة عن اى حد فى عمرهم
عزيزتى ...
الخوف الشديد مجهد لك انت نفسك ...
لما ولادك يمارسوا مهارة جديدة اكيد ممكن يغلطوا ...لكن الغلط دا هو الى هيعلمهم ..محدش بيتعلم بدون ممارسة ..و محدش بيمارس فى البداية بدون اخطاء
لما يتعلموا و تحسى انهم بيعملوا الحاجة بكفاءة هيقل القلق عليهم
قاومى خوفك الشديد عليهم ...علشان ما تفضليش خايفة كدة الى ماشاء الله
لو قاومتى فى البداية ..و حسيتى انهم بدأوا يعتمدوا على نفسهم ...القلق هيخف كتير و هتحسى انك مطمنة عليهم أكتر و أكتر
ليست هناك تعليقات:
إرسال تعليق