كل ابن آدم خطاء و كلنا بنغلط فى حق بعض لامحالة ....
و زى ما الناس بيغلطوا فيك ..اكيد انت كمان بتغلط فى الناس
تخيل لو أنت غلطت فى حق حد بكلمة أو تصرف (وماتقولش انا مش بغلط لان مفيش حد مش بيغلط ) ... و بعدين جه كلمك بشكل سئ ...أو أهانك ...أو رد عليك بلوم شديد و عتاب أو زعل منك و خاصمك ....هل هتكون مبسوط ؟
طب تخيل انه جاء و قالك : أنا زعلت لما حصل كذا ...بس انا بحبك ..و مش هقدر ازعل منك ...
و انا حرصى عليك وعلى علاقتى بيك اقوى من أى أخطاء ممكن تحصل
تخيل سعادتك و فرحتك هتكون ازاى و خاصة لو بتحبه
علم نفسك و دربها على كدة ..علشان تعيش سعيد و تنشر السعادة للآخرين أيضا
اقنعها ان كل الناس بتغلط مفيش حد معصوم من الخطأ البشرى حتى الانبياء فرسول الله صلى الله عليه و سلم عبس و تولى أن جاءه الاعمى
و موسى استفزه الغضب فوكز عدوه فقضى عليه
و داوود حكم بين الخلطاء دون ان يستمع للآخر
و يونس ذهب مغاضبا فخرج من قريته دون اذن ربه
اقنعها ان لو كل واحد زعل من التانى علشان غلط فى حقه محدش هيعرف حد نهائى اقنعها ان مش كل غلط اقف عليه
فيه غلطات ممكن تعدى ...و اتغافل عنها كانها لم تكن
و فيه غلطات لازم اقف عليها و اقولها لكن بدون زعل
و ان رد الخطأ بخطأ و حكاية ( لازم آخد حقى )دى مش فى كل الظروف و المناسبات تنفع
يا أما هنبقى حيوانات طول النهار تناطح فى بعض
فالرسول صلى الله عليه و سلم لم ينتصر لنفسه قط
علمها ازاى تعبر عن زعلها بمنتهى الحب انا اتضايقت لما حصل كذا ..بس حبى ليك يمنعنى من انى ازعل منك و كنت اتمنى لو عملت كذا و كذا بدل كذا
انت كدة بتعبر عن سبب الزعل ...و بطمنه على علاقتكم ببعض ..و بتقول له التصرف البديل الى ممكن يسعدك ...علشان يحاول يتصرف بشكل لائق بعد كدة
تعلم التغافل عن الصغائر ...و العتاب الرقيق على الكبائر
تعلم الصفح و التسامح و التغاضى ..تسعد و تسعد الآخرين
ليست هناك تعليقات:
إرسال تعليق