تفقدين حب زوجك عندما تتعاملين معه معاملة التجار ...كذا مقابل كذا ..
هعمل كذا بشرط انك تعملى كذا
الحب الحقيقى عزيزتى يجعلك تعطى و تشعرى بالسعادة و انت تعطين دون انتظار المقابل
مجرد رؤيتك لنظرة الرضا فى عينيه و ابتسامة السعادة على شفتيه بالدنيا و مافيها
بعض النساء تتعامل مع الرجل بالقطعة ...هعمل كذا و تعمل لى كذا
هجيب لأمك كذا و تجيب لأمى كذا ..
انا بعمل و بعمل و بعمل ...و انت فى المقابل بتعمل ايه ؟
هذا الاحساس عندما يصل الى الرجل يفقدك حبه بالتدريج
و ليس معنى هذا ألا تطلبى و ألا تعبرى عن رغباتك و لكن لا تجعليها مقابل خدماتك التى تقدميها له بل بدافع ما بينكما من الحب
و طول النهار تقوليله أنا بعمل و بعمل و بعمل و باخد ايه ؟؟؟؟
قوليله أنا عملت لك الاكلة الفلانية علشان انت بتحبها
انا نظفت و رتبت النهاردة علشان اعصابك تكون مرتاحة و تتبسط
انا جبت النهاردة هدية لوالدتك يارب تعجبها علشان انا بحبك و عايزة ارضيك
خلى اعمالك الى انت بتعمليها وانت متضايقة و مقهورة و مغصوبة اعمال تدل على حبك ليه و عبرى عن حبك دا دايما
بلاش شغل
انا عملت كذا ...لعله يطمر
انا عملت كذا... اما نشوف هتعمل ايه
كثير من الرجال أيضا يتعاملون مع زوجاتهم من هذا المبدأ أيضا ..العدل و ليس الفضل
منطق الحقوق و الواجبات ..انا على كذا و انت عليكى كذا
انا بشتغل فى الشغل و هى بتشتغل شغل البيت ..واحدة بواحدة
ليه اساعدها فى شغل البيت دا واجب عليها .هى يعنى بتساعدنى فى شغلى
ليه اجيب لها هدية قيمة ..هى عملت ايه يعنى زيادة عن الستات
ليه اشيل عنها البيبى شوية ..هو مش دا واجبها
جمال العلاقة الزوجية عزيزى بيبقى فى الفضل و ليس العدل
فى الرحمة و العطف و ليس مجرد الحق
يعنى لما تقولها انا هذاكر النهاردة مادة كذا لابننا علشان انتى اعصابك تعبت خالص معاه
لما تقولها انتى تعبانة النهاردة انا هحضر العشاء
لما تقولها خلي عنك انا هنزل هجيب طلبات البيت النهاردة
العلاقة الجميلة ليست مبنية على التعامل التجارى ..حقى وواجباتك
العلاقة السعيدة مبنية على الفضل و العطاء و الرحمة بين الطرفين
ليتهم يعلمون
ليست هناك تعليقات:
إرسال تعليق