الكثير من الرجال لازال عندهم قناعة انهم بيفهموا أحسن من زوجاتهم
علشان كدة لازم الست تسمع كلام زوجها بدون ابداء اسباب الامر و النهى
و الكثير عايزها تسمع الكلام لانه عايز يثبت لنفسه انه راجل يأمر فيطاع
و فاكر ان الرجوله فى قهر مراته انها تعمل حاجة او ماتعملش حاجة لانها خايفة منه
والكثير عايزها تسمع الكلام علشان يشعر بحبها ليه ..وعنده قناعة ان علشان بتحبه لازم تسمع كلامه ...مع انه لازم يثبت حبه ليها بنفس الطريقة ..دا لو الطاعة علامة الحب فعلا
و الكثيييير منهم مش عايزها تعترض أصلا ولا تناقش و لا تجادل ..تنفذ من سكات لأن هو الصح كدة و خلاص
أخى الفاضل :
أولا : لازم تفهم نفسك الاول انت عايزها تعمل كذا ليه
أو مش عايزها تعمل كذا ليه ؟..
يعنى ركز على فهم الاسباب جوة نفسك الأول ..مش هو حكم قراقوش و خلاص
ثانيا : لما تيجى تقنعها ماتقلهاش ( من غير اسباب انا عايز كدة )..لازم تقول عايز كدة ليه ؟
و تكون اسباب فى مصلحتها هى مش فى مصلحتك انت أو مصلحة أهلك
علشان تحسسها انك بتعمل لمصلحتها ..مش علشان مصلحتك
يعنى ماتقلش مثلا : انا عايزك تروحى تساعدى والدتى النهاردة فى شغل البيت علشان تريحيها....ولامؤاخذة يعنى والدتك ترتاح على حساب راحتها هى ليه ؟ ..انشاله ما ارتاحت (دا هيكون تفكيرها )
أو تقول علشان (روحى النهاردة لماما من الصبح ) ...ولو سألت ليه ؟ ترد حضرتك (كدة ..انا عايز كدة )
ماهو انت عايز كدة و انا يعنى مليش ارادة و رغبة مثلا ؟ دا تفكير مراتك
لكن لو قلتها بصيغة غير آمره و باسلوب اقتراح ..او تمنى
ايه رأيك ياحبيبتى النهاردة تروحى لماما من الصبح و أهى فرصة تعدوا تتكلموا مع بعض و تقربوا لبعض اكتر وتاخدى منها خبرات اكتر فى الطبيخ و رعايو البيبى ..دا رأيى
دا هى بتحبك و بتحب تتكلم معاك
(على فكرة الكذب فى الاصلاح بين المتناحرين يجوز )
دا بيخليها تحس انه مش أمر ...وان دا مجرد اقتراح و يديها الحرية فى اتخاذ القرار و بيخليها تحس ان دى حاجة فى مصلحتها انها تقرب لحماتها و تاخد خبراتها
و حماتها طبعا بتشتغل فى البيت ...فاكيد مش هتعمل ضيفة و هتقف تساعدها
اسلوب الكلام بيفرق كتير ..للى بيفهم
ثالثا : لو حضرتك مش عارف ليه ..بس هو مجرد ارتياح او عدم ارتياح للأمر ..قل لها بصراحة
مثلا انا مش برتاح لفلان الفلانى دا ..مش عارف ليه ..بس انا مش برتاح ليه
او انا مرتاح لانك تلبسى اللبس الفلانى ..مش عارف ليه ...بس انا برتاح لدا اكتر
عبر عن نفسك
و قول اتمنى انك ماتتكلميش معاه كتير
او اتمنى انك تلبسى كذا
دا اسلوب ظريف و لطيف و هتخليها تتجاوب معاك الى حد كبير ب
دل ما تقول لها ماتتكلميش فى فلان و ما تلبسيش كذا بصيغة الامر و بمنتهى التسلط
90% من مشاكلنا الزوجية بسبب اننا دبش فى كلامنا و اسلوبنا كله فظاظة و غلاظة و خبط فى الحلل و تسلط
و مش بنعرف نعبر بشكل لطيف و ظريف و مقبول للآخر ...و بالتالى بيشتعل فتيل العند فى مخ الآخر
ليست هناك تعليقات:
إرسال تعليق