عارفة طول ما انت طول النهار قاعدة فى أودتك و قافلة عليكى الباب
و بتتكلمى مع اصحابك عمرك ماهتحسى بمتعة و جمال الاسرة
هم ممكن يكونوا بيغلسوا عليكى ...بينتقدوك ...طول النهار اوامر و تعليمات
بس على فكرة طول ما انت قاعدة معتزلاهم الموضوع دا هيزيد اكتر و اكتر
لما تحاولى تعدى مع مامتك و تتوددى ليها بالكلام معاها وبالقبلات و الاحضان بالمعاكسات و المناغشات
و ياسلام لو جبتى لها هدية بتعبر عن حبك ليها
تفتكرى لما تكونى دايما كدة لطيفة مع مامتك و قلبها يكون راضى عنك ... اوامرها هتزيد و الا هتقل ؟
لما تبادرى انت بالمساعدة و تقوليلها هاتى عنك يا ماما احسن ؟ والا تسمعى الامر المباشر منها ..،اغسلى المواعين ...روقى الاوده...انشرى الغسيل
لما تروحى و تسأليها عن اخبارها ياترى عاملة ايه فى الشغل ؟ يا ترى مين اكتر واحدة صحبتك بتحبيها و ليه بتحبيها كدة ؟
طب انت و بابا حبيتوا بعض ازاى و اتجوزتوا ازاى ؟
طب ايه اكتر حاجة مش بتحبى تعمليها و بتعمليها علشان خاطرنا ؟
لما تسألى مامتك عن أحوالها هى كمان هتحب تعد معاك و تسألك و هتبقى عندها رغبة انها تسمعك بدون زعيق و عصبية
انت بشطارتك ممكن تصاحبى مامتك و تستمتعى بصحبتها و حنانها وتتعلمى منها الخبرة او تخليها تبعد عنك و تبقى كل كلامها معاك افعلى و لا تفعلى
ليست هناك تعليقات:
إرسال تعليق