البنات و الحب

الانسان بينجذب أوى للانسان الى بيقدر يديه الى هو عايزه

يعنى لو بنت نقطة ضعفها ان محدش بيهتم بيها فى أسرتها ولا بين أصحابها هتنجذب لأول ولد يظهر اى بادرة اهتمام حتى ولو كانت متصنعة
لو بنت نقطة ضعفها انها مش محبوبة من أهلها و من أصحابها فستسقط سريعا ادام اى ولد يقول كلمات حب و هيام
 لو بنت نقطة ضعفها انها مش لاقية حد يفهمها هتجرى على أول ولد يبيبن لها انه فاهمها كويس اوى حتى و لو كان مش بيفهم حاجة
لو بنت رغاية و بتحب الكلام هتقع فى أول واحد يسمعها و يفتح ودانه ليها
لو بنت حاسة انها مش جميلة هتترمى فى حضن أول واحد يشوفها جميلة او يضحك عليها بالكلام انها جميلة

علشان كدة حبيبتى لازم تكونى فاهمة نقطة ضعفك ايه و تاخدى بالك منها كويس

الحب مش عيب و لا حرام الحب احساس رائع بس لما يكون حب عاقل حب مزيج بين العقل و القلب
ولما العقل بييجى الاول و يقتنع بالانسان وبانه أهل لأن يكون شريك للحياة  وبعدين  ييجى الحب هادى يتسلل الى القلب بهدوء و سكينة و ارتياح

غير لما القلب بيحب الاول و يتعلق  بيبقى اقتحام هادر متعب عمره ما تحسى معاه بالراحة و الامان ابدا
بالرغم انك بتكونى سعيدة وانت بتتكلمى معاه بس بتحسى بالألم و عدم الطمأنينة و القلق المزمن و انك دايما تعبانة ومش فرحانة
و بيطغى على العقل تماما و يخليكى ترتكبى أخطاء شرعية و اجتماعية

حبى لكن اوعى عاطفتك تفقدك عقلك
اوعى تعملى الغلط الذى لا يرضاه ربك ولا اهلك و لا ترضيه أنت لنفسك علشان لاغية عقلك و ماشية ورا قلبك بس
 أوعى حبيبتى تنخدعى بحجج أنا متجوز أو أنا طالب او انا مش معايا فلوس دلوقت و أو انا مش بشتغل وخلينا اصدقاء بس أو اهلى مش موافقين على جوازنا
دى كلها حجج لعدم الارتباط بيكى

اعرفى اولا نقطة ضعفك و لا تسمحى لاحد انه يتسلل منها الا من اقتنع عقلك بيه
و لا مانع عقليا و ماديا و اجتماعيا و اسريا من الارتباط به

حافظى على قلبك فانه اغلى ما تملكين و لا تمنحيه الا لمن يستحقه بالفعل
يارب تخلى بالك