الزوج الناجح يعلم ان دوره فى اسرته ليس مجرد جلب المال
و ان نجاحه فى اسرته مش انه يوفر لهم حياة كريمة و بس
يعلم ان له دور نفسى و عاطفى مع زوجته
له دور نفسى و تربوى مع اولاده
طالما ساب دوره كموظف
فهو يلعب دور الاب ببراعة
و دور الزوج باتقان و حب
الزوج الناجح مايقلش انا حاسس انى بدور فى الساقية
انت هتفضل تدور فى الساقية طول ما انت لا تتطور
حياتك كل أيامها زى بعضها
لازم يكون النهاردة افضل من امبارح
و بكرة افضل من النهاردة
لانك فى كل يوم بتتعلم حاجة جديدة تنفعك فى شغلك و تخليك تنجز افضل و اسرع او تنتج احسن
بتتعامل مع زوجتك بشكل جديد و علاقتك معاها بتتحسن
بتتعامل مع ولادك بطريقة جديدة و علاقتك بيهم بتقوى
كل يوم فى حياتك بتاخد خطوة لادام
كدة هتحس انك مش فى ساقية
الزوج الناجح مش طول النهار فى الشغل
و بعدين يرجع البيت ادام الموبايل او التليفزيون
او تحت على القهوة مع اصحابه
انت ممكن تكبر دماغك من البيت و مشاكله
بتهرب من المسئولية العاطفية و النفسية
بس انت طول ما انت سايبها شايلة لوحدها المشاكل دى بتكبر و تكبر و تبقى عاملة زى كرة الثلج
الهروب عزيزى مش هيحل المشاكل
و هى زيك بالظبط لم تتدرب و لم تتعلم ازاى تواجه مشاكل الاولاد دى
اعدوا ناقشوا مشاكل الاولاد مع بعض و ساعدها فى حلها علشان حتى على الاقل تحس بانك أب
الزوج الناجح دايما ايجابى و دايما روحه المعنوية مرتفعة
و أحد اسباب ايجابيته انه يحيط نفسه بالناس الايجابيين الناجحين المتفائلين من الاصدقاء و الزملاء
وخاصة الازواج الناجحين فى حياتهم الزوجية
طول ما انت قاعد مع اصحاب بيشتموا فى الجواز و بيسبوا فى الستات و بيشتكوا من العيال هتتعدى حتى لو عايش مع زوجة كويسة
الزوج الناجح بيحاول يخلى النكديين دول بعيد عن دائرته المقربة حتى لا يتعدى منهم
و لو هم موجودين غصب عنه بيحاول بقدر المستطاع مقاومة تأثيرهم السلبى عليه بكل قوة
فهو لايحب النكد و الغم و الهم
الزوج الناجح دايما مركز على الايجابيات فى حياته
الايجابيات فى نفسه و شخصيته
الايجابيات فى شخصية زوجته
الايجابيات فى شخصية ولاده
الجمال فى بيته و شغله
دايما حاسس انه فى خير و نعمة كبيرة مهما كانت المشكلات و السلبيات
الزوج الناجح يعلم ان فيه مشكلات مالهاش حل
و خاصة لو مشكلة مش فى ايده حلها
زوجته عندها مشكلة فى شخصيتها
ابن متعثر دراسيا او متدهور اخلاقيا و كبر خلاص على انه يأثر عليه
حماة منكدة عليه عيشته
مشاكل مادية مزمنة و مالهاش حل
ليه تعد مكتئب و حزين و شايل الهم و الكرب
الناجح دايما يسأل نفسه
هستفيد ايه فى انى اعيش نفسى فى غم و هم
هل المشاكل هتتحل ؟
هو يسمح بوجود المشاكل و الصعوبات بدون ان يؤثر ذلك على مزاجه العام
ازعل شوية و بعدين فكها
التكشيرة و الصراخ و التلاكيك مش هتحلها بل بالعكس
انت كدة بتنشر الكآبة فى اسرتك كلها بدل ما تكون حضرتك بردا و سلاما عليهم
اوعى توصل لدرجة ان مراتك وولادك يكرهوا وجودك
لان احساسك دا هيسبب ليك تعاسة مابعدها تعاسة
الزوج الناجح زوج واثق من نفسه
عارف كويس اوى مواطن القوة لديه و يحسن استغلالها
و عارف مواطن الضعف و بيحاول يطورها
النقد قد يجرح و لكنه لايؤثر فيك على المدى البعيد
ماتحاولش تنكر ضعفك او تداريه او تهاجم من يواجهك بيه
خليك شجاع و قول ايوة انا ضعيف فى النقطة دى ولا يعيبنى هذا
اعترف لزوجتك ( لو كانت عاقلة ) بنقاط ضعفك حتى تتجنب انتقادك الدائم او السخرية او التهكم او تذكيرك المتواصل
قل لها انا ضعيف فى كذا و ساعدينى على تقوية الجانب دا
خليكى عون لى على النهوض و قل لها انت محتاج منها ايه علشان تساعدك
ثقتك فى نفسك بتخليك سهل تعترف و تعتذر و تراضى
بدل ما تقابل نقدها بالهجوم او الهروب
الزوج الناجح يتحمل المسئولية و لا يلقى باللائمة على الاخرين
يلقى اللوم على امه الى جوزته بنت مش عايزها ...كما لو انها شربته حاجة اصفرة
طالما وافق يبقى هو مسئول
يلقى اللوم على زوجته فى انها مش مريحاه
طب و حضر تك حاولت تريحها علشان تريحك ؟
يلقى اللوم على حماته و اهل مراته انهم مش بيقدروه
طب و هو حضرتك اسعدت و ريحت بنتهم و هم وحشين معاك
ماهم لو حاسين انها سعيدة هيشيلوك فوق دماغهم
دا غير القاء اللوم على الحكومة و الشعب و الامة العربية و النظام العالمى كله فى فشل حياته الزوجية
كن رجل
و تحمل المسئولية
و اكسر الشماعات الى بتعلق عليها اخطاءك
الزوج الناجح يعلم اهمية الترفيه و التجديد فى حياته و حياة اسرته
فالضغوط شديدة و المشاكل عديدة و الصعوبات ثقيلة
و لازم الواحد يتخفف يوم الاجازة من كل دا علشان يقدر يشيلها تانى
تاخد ولادك و مراتك و تنزل تفسحهم و تتبسط معاهم و تنسى الهم و الغم و مشاكل الكرة الارضية السياسية الى انت شايلها فوق دماغك
لو مراتك نكدية قل لها النهاردة اجازة من النكد و مش هنتكلم فى اى مشاكل
اخرج فى الاماكن المفتوحة فى المتنزهات و الحدائق و البحر و النيل و الخضرة
شم هوا نضيف و تنفس بعمق و املا رئتيك بالهواء النقى
و انت بتخرج النفس خرج معاه التوتر و القلق و العصبية
العب مع ولادك و استمتع بضحكاتهم و لهوهم و اضحك معاهم
مش لازم تصرف كتير
مش لازم تاخدوا شيل كتير و اكل كتير
لو ساعتين بس فى اليوم دا من غير احمال هيديك طاقة على تكملة الحياة مع التقليل من التوتر و الغضب
اوعى تنكد على اسرتك فى اليوم دا و سميه يوم السعادة
الزوج الناجح بيحافظ دايما على صحته و رشاقته ووسامته
مش علشان اتجوز و جاب عيال يبقى خلاص سايب كرشه يسرح ادامه
بيحافظ على لبسه و شكله جوة البيت زى برة البيت
يتعطر و يسرح و يحافظ على رائحة فمه
علشان حتى مراته نفسها تتفتح
الزوج الناجح مش حاسس ان علاقته بمراته علاقة ابدية و مستمرة الى ماشاء الله
و بالتالى الحب و الدلع و الفرفشة و الكلام الحلو دا كان فى شهر العسل وكفاية عليها كدة
الزوج الشاطر عارف ان العلاقة دى ممكن تنهار و ان الحب بيموت بالتدريج مع طول الامد
و انه لازم بكون فى حالة استنفار و تجديد مستمر لمشاعر زوجته ناحيته علشان يحافظ على حبها ليه
و الحفاظ عليها مش انك تخنقها بالغيرة و الشك و حب التملك و السيطرة و التحكم
الحفاظ عليها بانك تكسب حبها و تجدد الحب دا فى قلبها
الزوج الناجح يشعر فى قرارة نفسه بنعمة الزواج
و يفتكر ايام الشباب لما كان هيموت و يتجوز
و لما كان بيحلم ببنت الحلال
و لما كان بيحلم ببيت و حضن دافى و حب
و لو قرفان و زهقان
تخيل انك فقدت زوجتك و اولادك فى يوم ما
و تخيل حياتك من بعدهم
احساسك بالرضا عن حياتك جميل
لكن احساسك بالنعمة يجلب السعادة
ليست هناك تعليقات:
إرسال تعليق