لو انت زوجة لا تعمل
اوعى تحسى انك غير ناجحة
اوعى تحسى انك بدال مش بتكسبى فلوس يبقى انتى فاشلة
لو انت ناجحة فى علاقتك الزوجية يكفيكى حب زوجك و سعادتك بيه
لو انت ناجحة فى تربية اولادك يكفيكى انك خرجت افراد ناجحين
لو انت اثرتى فى المجتمع الى حواليكى باى نوع من التاثير الايجابى فانت قد حققت نجاح
الزوجة الناجحة مش لازم تبقى امرأة عاملة بتكسب فلوس
انت ممكن يبقالك دور فى مجتمعك بالعمل التطوعى
الانبياء و العلماء و كبار المصلحين فى التاريخ ماتوا و هم فقراء
نجاحك فى انك بتعملى حاجة مفيدة بتسعدك و تسعد الى حواليكى هو دا النجاح الحقيقى
الزوجة الناجحة ماتقلش كل الايام زى بعضها
انا حاسة انى بدور فى الساقية
الزوجة الناجحة مش بتدور فى ساقية
هى بتطلع سلم لهدفها
لان النهاردة افضل من امبارح
و بكرة افضل من النهاردة
لانها فى كل يوم بتتعلم حاجة جديدة تنفعها
بتتعامل مع زوجها بشكل جديد
بتتعامل مع ولادها بطريقة جديدة
بترتب بيتها بشكل جديد
كل يوم فى حياتها فيه جديد
و الجديد دا خطوة لادام
لتحسين علاقتها بزوجها و اولادها و تطوير نفسها
الناجح لا يدور فى ساقية الناجح يصعد دوما السلالم
الزوجة الناجحة مش طول النهار بتشتغل فى البيت
تنظيف و ترتيب و طبيخ و غسيل و نشير و كوى
عايزة بيتها دايما بيلمع
عايزة كل حاجة فى مكانها
عايزة كل حاجة صح اوى
دى زوجة مستهلكة فى شغل البيت
و ممكن يكون دا بيعمل لها توتر شديد مع زوجها و اولادها غير المرتبين و المنظمين
ايهما اولى
علاقات ممتازة مع زوجى و اولادى
و الا بيت على سنجة عشرة فى كل وقت و حين
الزوجة الناجحة ممكن تقبل مستوى اقل من النظام و النظافة علشان تلاقى وقت لنفسها و العناية بنفسها
و علشان تلاقى وقت لتنمية العلاقة مع زوجها و اولادها
و لو قدرت تعمل كل حاجة و تنظم وقتها يبقى خير و بركة
لكن لو ماقدرتش يبقى العلاقات مقدمة على الخدمات
الزوجة الناجحة دايما ايجابية و دايما روحها المعنوية مرتفعة
و أحد اسباب ايجابيتها انها تحيط نفسها بالناس الايجابيين الناجحين المتفائلين
و بتحاول تخلى النكديين بعيد عن دائرتها المقربة حتى لا تتعدى منهم
و لو هم موجودين غصب عنها بتحاول بقدر المستطاع تقاوم تأثيرهم السلبى عليها بكل قوتها
فهى لاتحب النكد و الغم و الهم
الزوجة الناجحة دايما مركزة على الايجابيات فى حياتها
الايجابيات فى نفسها و شخصيتها
الايجابيات فى شخصية جوزها
الايجابيات فى شخصية ولادها
الجمال فى بيتها
دايما حاسة انها فى خير و نعمة كبيرة اوى
الزوجة الناجحة تعلم ان فيه مشكلات مالهاش حل
و خاصة لو مشكلة مش فى ايدها حلها
زوج عنده مشكلة فى شخصيته
ابن متعثر دراسيا او متدهور اخلاقيا و كبر خلاص على انها تأثر عليه
حماة منكدة عليها عيشتها
مشاكل مادية مزمنة و مالهاش حل
ليه تعد مكتئبة و حزينة و شايلة الهم و الكرب
الناجحة دايما تسأل نفسها
هستفيد ايه فى انى اعيش نفسى فى غم و هم
هل المشاكل هتتحل ؟
يبقى هترفع شعار طنش تعش تنتعش
و تقول بأعلى صوتها ( يلعن أبو النكد )
الزوجة الناجحة زوجة واثقة من نفسها
مهما انتقدها الاخرون فهى عارفة قيمة نفسها كويس
حكم الاخرين عليها لا يعنيها
كلمات زوجها الناقدة لاتؤثر فى نظرتها لنفسها
كلمات حماتها دا رايها و هى حرة فيه
هى كمان مش خايفة علطول من كلام الناس لانها واثقة فى نفسها
و دايما تردد بينها و بين نفسها ( رأيك فى لا يدل على )
دا رايك و انت حر فيه
الزوجة الناجحة لاتلقى ابدا باللوم على الاخرين
على جوزها
على اولادها
على شغلها
على حماتها
على اهل زوجها
و لا تبرر افعالها الخاطئة
و لا تنكرها
هى انسانة مسئولة و شجاعة
فهى تعترف بالغلط علشان تقدر تصلحه
لكن طول ماهى قاعدة تبرر و تنكر و تلقى باللوم على الاخرين فعمرها ما هتصلح الغلط الى هى بتعمله
و هى دايما بتقول لنفسها
أخطاء الآخرين لاتبرر لى الوقوع فى الخطأ
الزوجة الناجحة تعلم اهمية الترفيه و التجديد فى حياتها و حياة اسرتها
بتاخد زمام المبادرة فى ذلك و لا تنتظر زوجها
بتجهز ليوم الاجازة علشان يبقى يوم مختلف
و لو جوزها مش عايز ينزل
تاخد ولادها و تنزل هى تفسحهم
تفسح نفسها مع اصحابها
لو مش عايز كدة ولا كدة
يبقى تفسح نفسها فى البيت
على سطح البيت
فى البلكونة
انشاله تملا البانيو و تتخيله حمام سباحه
لو جوزك حس اد ايه يوم الترفيه دا مهم و بيجدد روحك و نفسيتك و بيخليكى سعيدة
و لو حس انه مش بيتكلف فيه كتير
و لو حس ان ايجابياته اكتر من سلبياته و ان فيه اجازة من النكد بجد
هيبقى عنده استعداد يشاركك
الزوجة الناجحة مش حاسة ان علاقتها بجوزها علاقة ابدية و مستمرة الى ماشاء الله
و بالتالى الحب و الدلع و الزواق و الفرفشة و الكلام دا كان فى شهر العسل وكفاية عليه كدة
الزوجة الشاطرة عارفة ان العلاقة دى ممكن تنهار فى اى وقت و ان الحب بيموت بالتدريج مع طول الامد
و انها لازم تكون فى حالة استنفار و تجديد مستمر لمشاعر زوجها ناحيتها علشان تحافظ عليه و تحافظ على حبه
هى مش جابت منه عيال و السلام
هى عايزة تحافظ عليه علشان تحافظ على حبهم لبعض
و علشان تحافظ على اسرتها
و الحفاظ عليه مش انها تخنقه بالغيرة و الشك و حب التملك و السيطرة و التحكم
الحفاظ عليه بانها تكسب حبه و تجدد الحب دا دايما علطول
و كلما خبا تنفخ فيه تانى علشان يشتعل تانى جوة قلبه
الزوجة الناجحة بتحافظ دايما على صحتها و رشاقتها و جمالها
مش علشان جابت عيال تفقد انوثتها
بتحافظ على لبسها و شكلها جوة البيت
دا بيديها ثقة فى نفسها كبيرة
احد اسباب انهيار ثقة المراة فى نفسها اهمالها لشكلها و جمالها
الزوجة الناجحة مش عايشة دور الضحية
و لا عايشة دايما فى الماضى
و لا عايشة محلك سر
فهى قادرة على ان تعيش الحاضر و تعلم انها مسيطرة بنسبة كبيرة جدا على حياتها و دايما بتتغير للاحسن
الزوجة الناجحة لايمر عليها يوم الا لما تحمد ربنا على نعمة الزواج و الانجاب
و تشكر زوجها جميل صنيعه مهما عمل من سوء .... اكيد فيه حاجة كويسة عملها
و تشكر و تمدح ولادها على جميل صنيعهم ...بتدور على اى حاجة حلوة
لان اكيد حياتك الزوجية فيها حاجة حلوة
كنت بقول للنساء غير الراضيين عن حياتهم
تخيلى انكم عملتوا حادث و فقدت زوجك و اولادك لاقدر الله
تخيلى حياتك هتكون ازاى و احمدى ربنا على نعمته و فضله كل يوم
انا شخصيا لى سجدة شكر يوميا اسجدها منذ اربع سنوات تقريبا على نعمة الزواج و الاولاد
ليست هناك تعليقات:
إرسال تعليق