الزواج المادى

الزواج ايه غير شقة حلوة و فرح رائع و فستان زفاف تحفة و عريس حليوة و شبكة قيمة
وبعدين غسيل و طبيخ و تنظيف و ترتيب و عيال وواجبات و دروس و شغل و طلبات

كنت فاكرة الزواج كدة
لانى شفت أمى كدة
و لانى شفت كل اصحابى و بنات عمى و بنات خالاتى  كدة
الفلوس أهم حاجة ...و المشتروات و المظاهر أهم شىء
و الحاجات المادية دى لو مش موجودة عمر الواحدة ماهتعيش سعيدة و مرتاحة
والى جوزها ماتعبش فيها سهل انه يتخلى عنها
ولو عارف قيمتها لازم يقدرها
و قصقصى ريش طيرك لايلوف بغيرك
أفكار دمرتنى و دمرت علاقتى بزوجى من بداية خطوبتى
و كان دايما حاسس  انى مشيلاه فوق طاقته و ان طلباتى كتيرة
وهو محدش بيساعده علشان يجيب الى انا عايزاه
و فضل شايل الموضوع دا فى قلبه حتى الآن
و حاسس دايما انى مش مقدرة تعبه ولا حريصة على فلوسه و كل همى الفلوس و بس
كنت من اول الخطوبة و كل كلامى معاه عن الشقة و طلباتها
و اتجوزت و دخلت الدوامة
لحد ماانصدمت بخيانته
و لما واجهته
صرخ فى : انا عايز أحب و اتحب ...

انا متجوز واحدة أحبها مش واحدة ابقى ليها مجرد بنك يشترى طلباتها و طلبات بيتها و اولادها

انا ممكن اجيب كل الى بجيبه دا و اكتر  بمنتهى الحب
بس عايز واحدة تحبنى انا مش بتحب فلوسى
عايز واحدة تدينى الحنان و التفهم و الاحتواء ..مش واحدة تخدمنى و تشوف لى طلباتى المادية بس
انا انسان عنده مشاعر مش ماكينة فلوس
عايز واحدة أحس معاها بالامان على ممتلكاتى مش واحدة احس انها طمعانه فيهم

و ممكن تبيعنى انا شخصيا لولقت حد أغنى منى 

كانت فكرة الزواج مشوهة فى عقلى ...
كانت صدمتى قوية
فانا لست مادية
و لكنها طبيعة الحياة كدة ..و المجتمع الى احنا عايشين فيه كدة الماديات اهم حاجة 

لجأت الى ربى فقلت التمس الصورة الصحيحة فى كتاب ربى الى خلق الانسان ..ذكر و انثى ..و هو الأعلم بيهم
ربنا سبحانه و تعالى جعل الزواج السعيد آية من آياته
و عندما تحدث عن الزواج تحدث عن احتياجات نفسية لا يحققها الا الزواج
سكن و مودة و رحمة

السكن ..هو الهدوء النفسى و الطمأنينة و الاحساس بالأمان فى حضن الآخر

المودة ..هى عاطفة الحب الهادىء كالنسمة العليلة فى اليوم الحار

الرحمة ..هى التعاطف و المشاركة و المساندة

كنت دايما اقول له الزواج مودة و رحمة و سكن و انا مش حاسة معاك بدا ..
مع انى عمرى مافكرت امنحهم ليه ازاى ؟

ليه دايما حاسة ان قيمتى عنده بقدار مايصرفه على و على البيت و الاولاد من فلوس
من امتى الانسان الحر بيتقدر بالفلوس ؟
العبيد و الاماء فى سوق النخاسة هم الى كانوا بيتقدروا بالفلوس بس
انا مش بضاعة تباع و تشترى علشان تروح للى يشترى اكتر زى ماكانت نظرتى لنفسى و انا بختار عريسى 

كنت دايما خايفة من منظرى أدام الناس ...الناس هتقول على ايه لما تلاقينى اقل من فلانه و علانة ؟
ماهو الناس دى مش هتجلب لى سعادتى
انا مهتمة بيهم ليه أصلا ...وهو كلامهم دا هيضرنى  فى ايه و الا هينفعنى فى ايه 

طب و ابقى ليه اقل من أختى  و الا اقل من بنت عمتى و الا بنت خالى والا سلفتى

للاسف انا عشت فى مقارنة مستمرة و صراع من الاخرين علشان دايما اكون احسن منهم 
العبرة مش بالفلوس العبرة بالانسان الى انا اختارته و شخصيته و رجولته و علاقته بيا ...

هل هكون سعيدة انى اكون افضل منهم من برة

و جوة البيت عايشة فى هم و كرب و نكد معاه 
ولو عايزة أتمنظر اتمنظر بفلوسى أنا مش بفلوسه هو

هو ذنبه ايه يعالج لى عقدى النفسية و احساسى بالنقص ادام الى حوالى 
هو لو حبنى بجد من قلبه هيدينى عينيه برده و مش هيبخل عنى بحاجة 

و الطلبات الكتيرة و قصقصة الريش مش ضامن لانه مايتخلاش عنىاو يتجوز على ..بالعكس
دنا خنقته بالطلبات لدرجة خلته يهرب منى

و فيه بنات دلوقت بتقبل باى حد حتى لو مش هيصرف عليها 

و خنقته بالمؤخر الكبير الى ممكن يخليه يعد يؤذينى و يطفش فى علشان أخلع منه و اتنازل عن كل حقوقى و اقول حقى برقبتى 

و خنقته بالشقة الفخمة الى خايف تروح منه وتخليه عايش معاى جسد من غير روح لانه مش لاقى مكان تانى يعيش فيه 

الماديات لاتصنع ابدا السعادة الدائمة
الا سعادة وقتية لحظية فقط تنتهى بانتهاء المشهد ...المنظر أدام الناس
و تظل الحقيقة و العلاقة التى تفتقد المشاعر  طوال العمر

اعتذر يا زوجى العزيز
فقد اعمتنى الافكار المادية عن الاحساس بك و بمشاعرك
و عن الاهتمام بالعلاقة الانسانية بيننا و الحفاظ عليها
هحاول ادور على الحب فى قلبى الاول لان  شكلى كدة عمرى ما حبيتك بقدر ما حبيت فلوسك  ..

وقبل ما احاسبك على اخلاصك احاسب نفسى على ماديتى و طمعى 
يمكن اقدر استردك و اكسب حبك فى قلبى تانى