المقارنة المستمرة بينك و بين الآخرين مصدر دائم للهم و النكد الذى يعتريك من داخل نفسك
خلقنا الله جل و علا مختلفين ...كل واحد عنده مميزات و عيوب فى شخصية ..
و كل واحد عنده ظروف بتساعده و ظروف بتعارضه ..
و مفيش حد فى الدنيا معندوش مشاكل ..
و مفيش حد فى الدنيا أحسن من حد
قد تكون فلانة اكثر منك جمالا ...لكن لو دخلت فى حياتها و عرفت مشاكلها ممكن تقولى فى ستين داهية الجمال
قد تكون فلانة اغنى منك ...لكن لو دورت هتلاقى صحتها فيها مشكلة او زوجها عنده مصيبة او ولادها فيهم حاجة
فلانة رزقها الله بزوج رائع (من وجهة نظرك ) لكن ما ادراك انها لا تشكو من بلاوى خفية بيعملها ليست ظاهرة لك
فلانة شقتها تحفة ...لكن مين ادراك انها سعيدة و مرتاحة فيها
و قديما قالوا فى الامثال : الى يشوف بلاوى غيره تهون عليه بلوته
طول ما أنت بتقارنى نفسك بالى افضل منك فى مجال معين طول ما انت حاسة بالنكد من جواك
و ممكن يوصل لدرجة الغيرة منهم
و ممكن يوصل لدرجة الحسد ليهم
دايما بصى لما بين يديك من النعم ...
و ركزى نظرك على من هم أقل منك فى كل مجال ..علشان تحمدى ربنا على نعمته
و صدق رسول الله صلى الله عليه و سلم : ( انظروا إلى من هو أسفل منكم ، ولا تنظروا إلى من هو فوقكم ، فهو أجدر ألا تزدروا نعمة الله عليكم )
قاومى هذا التفكير و هذا الاحساس بالمرارة من دوام المقارنة ...فانها احد اسباب النكد النفسى
ليست هناك تعليقات:
إرسال تعليق