مفيش حد يقدر ينسى الاساءة ..وخاصة لما تعمل جرح عميق وألم شديد
يعنى لو حصلك حادث عربية هل هتنساها مهما مرت السنوات ؟
لو عملت عملية و عانيت من آلام العملية بعدها هل تقدر تنساها حتى بعد ماخفت ؟
محدش بيقدر ينسى الاساءة الشديدة
بس ممكن نسامح طبعا
و السماح دا درجات ربنا سبحانه و تعالى قال عليها :
(والكاظمين الغيظ و العافين عن الناس و الله يحب المحسنين )
اول درجاتها انك تكظم غيظك و تمنع شرك و انتقامك عنه ..
يعنى يبقى فى قلبك غل و غيظ و ألم و غضب بس متحكم فى تصرفاتك و مش هتعمله حاجة
الدرجة التانية انك تعفو ..و العفو غير النسيان ..
العفو انك مايبقاش عندك الغل و الغضب و الغيظ الى جواك ..
يعنى من جواك ..مفيش رغبة للانتقام و الرد ...
انا مش ناسى بس معنتش تعبان و بحاول اتعامل معاه عادى ...الجرح كدة خف
الدرجة الافضل و هى درجة الاحسان ..يعنى انت مش ناسى ومفيش جواك غل و لا غضب و مش كدة بس دا انت بتتعامل معاه بالاحسان اليه
و الدرجة الأعلى و الاعلى انك كمان ممكن تحبه ..تخيل !!!!!
ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ (34) وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ
بس دا هيعتمد على رد فعل التانى و هل بيحاول يعتذر و يراضيك و يعوضك الى فات و الا مطنش ؟
دا مش نفاق ..دا تحكم فى التصرفات و الأفعال و قمة فى ضبط النفس
الألم النفسى الشديد لن ينسى
بس ممكن نعديه
نتخطاه
نتناساه
يعنى نعمل نفسنا ناسيينه ..و هو دا التسامح
ليست هناك تعليقات:
إرسال تعليق