اكتر حاجة بتزود علاقة الحب و الحميمية بينك و بين الناس
(والديك ..اخواتك ..اصدقاءك ...شريك حياتك ..اولادك ) .......المشاركة
علميا المشاركة بترفع هرمون الاكسيتوسين فى الجسم ...و هو مايسمى هرمون الاحتضان ..الهرمون دا لما بيزيد بيديك الاحساس بالأمان و الانتماء و الحميمية
لكن أكتر مانع بيمنع خروجه فى جسمك او جسم من تحب الأذى النفسى الى انت مصاب بيه او مصاب بيه الآخر
قبل ماتحاول تقوى علاقتك بأى حد حاول تعتذر عن اى اساءة صدرت منك ...وتحاول تراضيه ..و تتوقف عن اعادة ايذائه تانى
أما الانشطة الى ممكن تتشاركوا فيها و بتكون السبب فى زيادة حميمية العلاقة لانها بترفع هرمون الاكسيتوسين فهى :
- المحادثة : و خاصة الكلام على مستوى المشاعر و الأفكار و الاسرار و الامور الخاصة بكل منهما
زود اسئلتك لمن تحب عن مشاعره و افكاره
انت حاسس بيه ؟
أو رأيك فى كذا ايه ؟
أو إيه الفكرة الى خلتك تعمل كذا ؟
- تبادل الكلمات الايجابية التى تسعد الآخر :زى كلمات الشكر و الاعجاب و المدح و التشجيع والموافقة و التفهم
انا ممتن جدا لانك بتعمل كذا
انا معجب بيك فى كذا
انت ماشاء الله فيك ميزة رائعة كذا و كذا
انا موافقك جدا فى النقطة دى
هايل ..ممتاز ..رائع ..ربنا يبارك فيك
- انشطة عملية تعملوها مع بعض : تخرجوا مع بعض ..تاكلوا مع بعض ..تروحوا سينما مع بعض ..تتمشوا مع بعض ...تتفرجوا على التليفزيون مع بعض
- انشطة ممتعة ليكم انتم الاتنين تخليكم تضحكوا انتوا الاتنين مع بعض :
تبادل النكت
اتفرجوا على فيلم كوميدى مع بعض
تحكوا لبعض مواقف كوميدية حصلت لكم أو حصلت لغيركم
انشاله تزغزغوا بعض ..
تغلسوا على بعض غلاسة تخليكم تضحكوا
- انشطة جديدة أو انشطة مثيرة :
روحوا مكان جديد ...
كلوا فى مطعم جديد ...
سافروا مكان جديد ..
روحوا الملاهى مع بعض ..
روحوا سفارى مع بعض ..
انزلوا البحر مع بعض
- مساعدة بعض فى الانشطة الى بيعملها كل واحد فيكم ..او الوقوف جنبه فى لحظات الضعف او الألم و الاوقات الصعبة
- التلامس الجسدى : القبلات ..الاحتضان ...لما تكلمه تحط ايدك عليه ..على كتفة ..على فخذه..
امسك ايده وانت بتكلمه ...حسس على شعره ...العب فى ودانه
- نظرات العين الى بتعبر عن الحب ....تبادل النظرات و خاصة لو مفيش فرصة للتلامس تعمل السحر
- الابتسامة المتبادلة و خاصة لو عينيكم جت فى عيون بعض .
- لو اتنين متجوزين يبقى العلاقة الجنسية المشبعة من اقوى انواع التواصل الى بتطلع جرعات كبيرة من الاكسيتوسين
الحاجات دى ممكن تعملها مع الاصدقاء و الاخوات و الابناء ..علشان تزود الحميمية بينك و بينهم و بتخليهم يحسوا بالامان و الراحة و هم معاك
ليست هناك تعليقات:
إرسال تعليق