تزوجت زواج صالونات ..لم أشعر بالحب ناحيتها
لكنها كانت نعم الزوجة على مدار 20 سنة زواج
كانت حياتى هانئة هادئة حتى دخلت هذه الشبكة اللعينة
وقعت فى حبها فقد كانت حلم حياتى ..
قابلتها و توالت لقاءاتنا و اتفقنا على الزواج فأنا لا أقوى على فراقها و أريد أن أعيش بقية عمرى فى أحضانها
دلينى بالله عليك ..ماذا أفعل حتى لا أكون خائناََ لعشرة زوجتى و حتى أقلل من ألمها الى أقصى درجة ممكنة
- أشكر حضرتك جزيل الشكر على مراعاتك لمشاعر زوجتك فقليل من الرجال من يفعل ذلك
الألم و المعاناة واقعه لا محالة مهما حاولت تحجيمها لكن التعويض و الأمان المادى ممكن يخفف من التوتر و القلق الى حد كبير
و الألم بيكون ليه عدة أسباب :
بيكون على الماضى ...ندم على ماقدمته من أجلك و من أجل بيتك و أولادك و احساس بضياع العمر ...و دى ممكن تقل مع بعض النساء لو عوضتها ماديا
يعنى تحسب هى لو كانت اشتغلت بشهادتها كان مرتبها هيكون كام ؟
أو على الأقل لو كنت جبت شغالة على مدار عشرين سنة كانت هتاخد كام؟
و تحسبها على مدار عشرين سنة ...
لانها لو مكانتش اتجوزتك كانت هتشتغل
و تحط لها المبلغ دا فى البنك باسمها تعويض ...ترضية ..مكافأة نهاية الخدمة
الألم بيكون سببه كمان التردد و مش عارفة تعمل ايه فى الوقت الحالى ..هل تستمر معاك و الا تطلق ؟
و دى لازم تطمنها تماما لاحترامك لاختيارها و تديها الحرية الكاملة فى الاختيار ...احساسها بانها قادرة على الاختيار الآمن بيقلل توترها و ترددها
الألم كمان بيبقى سببه الخوف الرهيب من المستقبل
هتعيش فين ؟
سيبها فى بيتها معززة مكرمة حتى لو طلبت الطلاق و مالهاش حضانة ..دا أقل واجب لاكرامها ...
و لو تكتب لها البيت دا تعويضا لسنين عمرها الى ضاعت فى خدمتك و رعايتك يبقى جميل
خليها تختار بين انك تكتب لها البيت او تحط لها فلوس فى البنك
المهم يكن فيه تعويض مادى يليق بعمرها
هتصرف منين ؟
اعمل حسابك ان الفلوس الى انت هتحطها لها فى البنك ممكن تدخل لها عائد يعيشها حياة كريمة لو مش هتكتب لها البيت
أن تتعهد لها انك هتصرف على ولادك مهما حصل لان دا بيكون خوف رهيب عندها
لو أمكن برده تحط لهم مبلغ فى البنك العائد بتاعه يكون كافى للانفاق عليهم علشان تطمن
احذر تماما من انك تنفق على زيجتك الجديدة من غير ما تأمن مستقبل اسرتك القديمة
احذر من انك تظلمها و تظلم ولادك بسبب رد فعلهم السىء ..
انت بتهدم بيتك فاكيد يعنى مش هياخدوك بالاحضان و يتمنولك السعادة ...
اكيد هيبقى فيه غضب و ردود أفعال سيئة ...
احذر من ظلمهم بسببها
احذر ان تشغلك حياتك الجديدة عن مسئولياتك الهامة ناحية اولادك ...مهما كانت سعادتك ..و مهما كان رد فعلهم ..فانهم لازالوا مسئوليتك
فكونك هتبدأ حياة جديدة مش معناها انك تهرب من مسئولياتك السابقة
دا بالنسبة لاكرامها ماديا
اما اكرامها معنويا بانك تشكرها على حياتك الهانئة المستقرة
بانك تقول لها انك تكن لها مشاعر طيبة و ان دا مش تقصير منها
تحسسها من كلامك انك هتكون دايما فى رعايتها و مساندتها لو احتاجت اى حاجة مستقبلا
و انها هتعيش معززة مكرمة طول ما انت على وش الدنيا
اتمنى من كل واحد ينوى الزواج التانى الا يبنى سعادته على تعاستها
و ان يحاول ان يستوعب غضبها و يسعى الى تعويضها و طمأنتها بقدر ما يستطيع
هكذا يفعل الانسان المحترم
ليست هناك تعليقات:
إرسال تعليق