قالت : من يوم مادخلت صفحتك ببكى يوميا على عمرى الى ضاع فى جواز فاشل استمر 25 سنة انتهى بزواجه من أخرى و أولاد غير بارّين بىّ
حبيبتى :
أولا : الى أنا بكتبه دا سواء فى ادارة الذات أو العلاقة الزوجية او فى تربيتنا لأولادنا هو النموذج المثالى
هو السعادة بنسبة 100%
هو النجاح فى التربية بنسبة 100%
هو الصح
بس مش معنى كدة ان كلنا نملك القدرات على تحقيق هذه ال100%
أنا نفسى -كاتبة هذا الكلام- لم أحقق هذه النسبة و عندى لسة مشاكل زوجية و أرتكب الأخطاء مع اولادى و فىّ عيوب فى شخصيتى و دا طبيعى جدا ..هى دى الحياة الواقعية الطبيعية
لكننا بنختلف فى نسب النجاح
فيه اتنين بينجحوا بنسبة 95%
و فيه اتنين بينجحوا بنسبة 80%
و فيه اتنين مش بيجيبوا اكتر من 50%
هم و شطارتهم و مذاكرتهم واجتهادهم
احنا بنشوف النموذج الأمثل علشان يبقى عندنا هدف و طموح اننا نوصل لهذا الأمثل
علشان مايفتكرش كل واحد انه صح و مايحاولش يغير
مجرد انه يعرف انه كان غلطان ...هيحاول يصلح للأحسن
فلاتبكى عزيزتى فالنموذج المثالى الكامل و السعادة المطلقة و الابناء الكاملون غير موجودين
و لكننا نحاول أن نسدد و نقارب...و نحاول أن نتطور و نتغير للأفضل
ثانيا : مش معنى ان زوجك اتزوج بأخرى يبقى انت كنت فاشلة كزوجة
فالعلاقة ..اى علاقة انسانية مسئولية طرفين و ليس طرف واحد
و فيه ازواج علاقتهم كانت بزوجاتهم ممتازة و برده راح اتجوز
حس بالملل من حياته
حس بقرب الشيخوخة و عايز يثبت لنفسه انه لسة شباب
حس بالضعف أمام حب او إغراء
أيا كانت الاسباب بس مش أى زوج بيروح يتزوج ...زوجته كانت فاشلة
انت انسانة عظيمة و لازم تحسى بكدة فى قرارة نفسك ..
وعمرك ماضعش ..انتى اديت رسالتك كزوجة و كأم بقدر ما تستطيعى ...و بقدر ما تعلمى
كونه انه طلع ندل ...او أنانى ..أو اتهبل على كبر ..دى مش مسئوليتك أبدا
ثالثا : مش معنى ان ابنائك غير بارّين بيكى انك كنت فاشلة كأم ..
فابن نبى الله نوح عليه السلام كان كافر
الهداية بيد الله اولا و اخيرا ..و ممكن واحدة بتربى صح جدا ..و يبقى فيه جينات غلط او مشاكل نفسية و سلوكية او خبرات و صدمات او اصدقاء سوء فى اولادها
فى النهاية
مش عايزاك تحسى بالفشل
العمر مجرد رقم و قيد نحن من يصنعه
ابدئى حياتك كأنك لسة شابة صغيرة ...
و فكرى لو عاد بك الزمن ممكن تعملى ايه ...و ابدئى
فكى قيود العجز و الكسل و قلة الحيلة و السن و الصحة و الناس هتقول على ايه و ضاع العمر يا ولدى ...فكى القيود و انطلقى
وحاولى تعيشى بقية حياتك سعيدة
فقد رأيت الكثيرين ممن بدأوا حياتهم السعيدة بعد الاربعين و الخمسين
و ربنا معاك
ليست هناك تعليقات:
إرسال تعليق