أنا عشت فى بيت كله مشاكل بين ابويا وامى و بينى و بين اخواتى
كان نفسى اتجوز واحد يحتوينى و يعوضنى الى اتحرمت منه من الحب و الحنية و دفء العيلة
وافقت على أول واحد اتقدم لى ..
أهلى وافقوا عليه علشان جاهز و الناس بيقولوا عليه كويس
اتجوزت جواز سريع و سافرت معاه الخليج و هنا بدأت معاناتى
هو عايش فى وادى و أنا فى وادى تانى خالص
هو عاش سنين فى الغربة وحيد و أقلم نفسه على الوحدة دى
و اكتشفت ان معندوش استعداد نهائى ان أى حد يشاركه وحدته
بيروح الشغل و ييجى من الشغل ..ساكت لا أعلم عنه شيئا
دنا معرفش أصلا طبيعة شغله ايه ولا دخله ايه ..وكل ما اسأله يقولى مالكيش دعوة
يعد على اللاب و الموبايل بالساعات فى حجرته ..هو له حجرة خاصة مبيعرفش ينام جنبى
فى أول جوازى كنت بنهار و عملت معاه مشاكل كتير علشان أحس انى زوجة لحد ما زهقت من كتر الزعل
يعنى غربة ووحدة و مفيش أى مشاعر بيننا و لا كلام ..
طلباته قليلة و كلامه قليل و حركته قليله يعنى بيخرجنى بالعياط و خروجه صامتة برده
حتى العلاقة الخاصة نادرا ما يطلبها
طب كان بيتجوزنى ليه ؟
لحد ما اتعرفت علي واحد على الفيس بوك
ملا على كل حياتى ..
كان بيكلمنى ليل و نهار ..
اتعلقت بيه لدرجة كبيرة و حكيت له على كل معاناتى و لم أفق الا بعد أن طلب منى صور عارية
كدت للأسف أن استجيب لخوفى من انه يبعد عنى
سألتك أيامها و قلتي لى لازم تشغلى نفسك بحاجة مفيدة
لازم تبنى نفسك من جوة ..
انت فاضية من جواك و عايزة تملى الفراغ بأى طريقة حتى لو طريقة غلط
و الطبع الانطوائى فى جوزك صعب انه يتغير
فحاولى تتأقلمى و تدورى على سعادتك لو مش عايزة تطلقى
بدأت أدور على أنشطة حوالى
بدأت آخد كورسات تعليم انجليزى
بدأت أروح مركز تحفيظ قرآن
بدأت آخد دورات خياطة و تفصيل و بعدها أخدت دورات طبيخ و تدبير منزلى
و المركز الى كنت باخد فيه الدورات عرض على انى اشتغل معاهم مدربة
اتعرفت على ناس كتير و كونت صداقات من كل الاجناس
بنتكلم مع بعض ..و نخرج مع بعض .. بيزورونى و ازورهم
وكانوا هم الى جنبى فى فترة ولادتى
تصدقى ان جوزى بدأ يتكلم معايا و يخرج من عزلته شوية ؟؟؟!!!!
بيسألنى عملت ايه النهاردة و اقعد احكيله على الى اتعلمته و الى قابلتهم
فعلا يادكتورة
الست الكئيبة الى حياتها فاضية ومفيش فى حياتها حياة لاتجذب أبدا الرجل و تصبح مملة و رتيبة من كلامها المتكرر و شكواها المستمرة
لكن لما بتدور على سعادتها و حياتها بتجذبه بابتسامتها وروحها الحلوة و انطلاقتها
انا فعلا بدأت أحس بالسعادة من غيره
مليت وقتى بين ابنى و القراءة و الدورات
معدش عندى وقت أفكر فى الحرمان الى كنت عايشة فيه
و يا عالم
مايمكن جوزى يحس بى مع الوقت ..
عندى أمل كبير و متفاءلة انه يمكن يتغير
ليست هناك تعليقات:
إرسال تعليق