لما تصلح بين متخاصمين

فى مجتمعنا طبع غبى غبى جدا
ساعات بنعمله بحسن نية و نلاقى المشاكل بتكبر و بعدين نقول مش عارفين نصالح بين الناس
و ساعات الاهل لما بيتدخلوا بين زوجين
او زوج يتدخل بين مراته و اهله
او زوجة تتدخل بين زوجها و اهلها

لما س و ص يكونوا متخانقين مع بعض
و ييجوا هم الاتنين يشتكولى
اروح اقول ل (س) إن (ص) بيقول عليك كذا
و أروح أقول ل (ص) إن (س) بيقول عليك كذا

دا (س) بيقول انك عملت كذا
دا (ص) بيقول انك عملت كذا

قال ايه بوصل وجهة نظرهم لبعض !!!!!!!!!!

طالما كل واحد فيهم حس ان التانى بيشتكى لطرف ثالث دا مؤلم جدا
و ياسلام لو قال كلام وانت فهمته بشكل مختلف ووصلته بشكل مختلف عن الى يقصده يبقى اكيد كداب فى أصل وشه و بيفترى على

لما تيجى تصالح بين الاتنين يا استاذ ذكى ..
اسمع منهم فقط ...فقط اسمع
و يوم ما تتكلم حاول تتكلم كلام كويس ..انشاله بالكذب
دا و الله هو نفسه يصالحك بس مكسوف ...
دا بيقول عليك كلام كويس جدا
دا من كلامه حسيت انه بيحبك اوى
دا متضايق جدا انك اتضايقت
طب مايمكن كان قصده كذا (نية طيبة ) لما عمل كذا
هو تلاقيه كان متضايق من حاجة تانية (طلع له اعذار )

لما تيجوا تصالحوا الناس طيبوا خاطرهم و هدوهم مش تشعللوهم اكتر بكلام دا هو بيقول عليك كذا
ورققوا قلوبهم على التانى
و لما تحس انهم هدوا و بدأوا يتكلموا بالعقل

نفكر بأة فى هدوء فى حل المشكلة
نفكر فى المستقبل مش نعد نعيد و نزيد فى الى حصل و جرى و اتقال و اتعاد

خدوا خطوة لأدام