تحتاج المرأة الى روح المبادرة

قالت : طلبت من جوزى انه ياخدنى فى حضنه و يطبطب على لما أكون تعبانة
و حضرتك قلت لنا لازم نطلب و مع ذلك هو لم ينفذ

حبيبتى

 بعد الطلب ييجى مرحلة التدريب
انت مش مجرد انك تطلبى هيتنفذ لان دا تغيير فى الطباع محتاج تدريب ووقت طويل
تخيلى انت بتحبى السهر و قررت انك تنامى بدرى هل سهل ان تانى يوم علطول تنامى بدرى ..هتاخدى وقت علبال ما تعودى نفسك
 لو انت عصبية و سهلة الاثارة هل لو قررت انك مش هتتعصبى تانى علطول كدة هتلاقى نفسك مش بتتعصبى

الموضوع محتاج تدريب طوييييييل جدا و تبدئى بواحدة واحدة يعنى تقولى انا بحب اوى كذا و تعدى تأكدى على الموضوع كل ما تيجى مناسبتها
يعنى لما تكونى تعبانة تقوليله : ياسلام يا حبيبى لو تاخدنى فى حضنك
نفسى تاخدنى فى حضنك وتطبطب على و تروحى انت تدخلى فى حضنه
و تقوليله : الااااااااه التعب راح خلاص مرة و اتنين و تلاتة لحد ما يتدرب و يتعود

لو انت واقفة فى المطبخ و مهدود حيلك و كل شوية تروحى تدخلى فى حضنه و تبوسيه و تقوليله برقة اصل الشحن بتاعى بيفضى فجاية أشحن :)

لو انت قرفانة و زهقانة من مذاكرة العيال و تجيله كدة بمنتهى الهدوء و تحطى دراعه عليكى وتقوليله برتاح شوية من قرفهم و مش برتاح الا فى حضنك

لو انت متعكننة و متنكدة من اى حاجة
قوليله ممكن تاخدنى فى حضنك أعيط فيه شوية ..ما تتكلميش
فضفضى بس عياط ..اكيد هتصعبى عليه لو ما اتلكمتيش و هيرميك و يزقك لو اتكلمتى ..ما تتكلميش ارجوك

لو انت متضايقة أوى أوى منه و فايض بيكى و خلاص هتموتى و تتكلمى قوليله خدنى فى حضنك و احضنى جامد أوى يمكن شحنة العواطف تهدى الكلام شوية


تدريب الرجل على الحاجات دى محتاجة صبر و مبادرة منك انت
زى ما بتدربى ابنك كدة على دخول الحمام او انه يلبس هدومه لوحده او ياكل لوحده