قال : طلبت من مراتى كتير انها تاخد بالها من مظهرها فى البيت و مفيش فايدة ... هل فيه طريقة أو أمل ؟
قلت : للاسف المرأة المصرية تربت لم تر أمها تتزين داخل المنزل ..علشان عيب الزينة ادام الاولاد
و تعودت فى تربيتها ان الملابس و الزينة و الشياكة تكون برة البيت
ولما كانت و هى صغيرة تتزوق و تقف ادام المراية كانت مامتها تنهرها و تقول لها انت ماوركيش حاجة الا المراية هتتجننى
و لما كبرت شوية و بقت عايزة تتزوق بأة عيب تتزوق ادام باباها و اخواتها الصبيان
و لما اتخطبت لحضرتك كانت بتتزوق ليك لما تخرجوا مع بعض و لما اتجوزت من حضرتك فى البداية ماكنتش بتهتم بزواقها و لا بتعلق باى تعليق يشجعها على انها تستمر .. بل ممكن تكون بتعلق تعليقات سلبية ..انت تخنت ...انت شعرك بأة وحش ..بشرتك بقت كدة ليه ..ايديك نشفت كدة ليه ؟..
فدا عمل لها احباط انك مش شايف الا الوحش
و ياسلام كمان لما تعد سيادتك ادام التليفزيون و عينيك تتسمر ادام الجميلات الى مفيش وراهم حاجة فى حياتهم و اكل عيشهم و شغلتهم ...اغراء حضرتك فييجى فى مخها ( هتروح فين ياصعلوك بين الملوك ) ...المزيد من الاحباط
و ياسلام لما تعد سيادتك كمان تمدح فيهم و فى جمالهم و حلاوتهم و انوثتهم و رشاقتهم و...و...و...... انت كدة بتطعن انوثتها فى مقتل ..و بتحسسها انها مهما عملت مفيش فايدة
و ياسلام كمان لما تهملها جنسيا و تعد تتفرج على الصور و القنوات و المواقع الاباحية و تشيت معاهم و تخرج طاقتك الجنسية معاهم
تفتكر واحدة زى دى مش هتكره نفسها و شكلها ؟ و تكرهك ؟ و تكره اليوم الى اتجوزت فيه ؟ و تكره عيشتها و حياتها كلها ؟
دا كل دا....قبل الحمل و الولادات و التشوهات الى بتحصل معاهم ...دا موال تانى خالص بالله عليك قل لى أنت نحل المعضلة المكلكعة دى ازاى ؟
ليست هناك تعليقات:
إرسال تعليق