حدد تماما الحاجات الى عندك قصور فيها و دايما محسساك بعدم الثقة فى نفسك
و بعدين وزعها بين حاجات ممكن تتغير و حاجات لأ
يعنى مثلا لو انت قصير والا طويل دى حاجة مش هتقدر تغيرها
لو انت اسمر و دا تاعبك دى حاجة مش هتتغير
لو عيونك ضيقة والا مناخيرك كبير دى حاجة مش هتغيرها
لكن الصفات الاخلاقية و الطبايع المؤذية دى ممكن تتغير
شوف أكتر سلوك أو طبع عاملك مشكلة فى حياتك و ركز عليها
مش لازم تغير كل حاجة مرة واحدة
ركز على الطبع دا او السلوك دا
و حط لنفسك حلول تصلحه مكتوبة
على سبيل المثال :
كنت دايما بعانى من العصبية على اولادى
قعدت مع نفسى و حطيت عدة حلول
أول ما احس بالنار فى نافوخى ادامى عدة اختيارات :
- ادخل الحمام اغسل وشى أو اتوضأ أو آخد دش
-ادخل الاودة و اقفل على نفسى الباب و امدد على السرير واعمل تمرينات نفس
-اطلب منهم يمشوا من ادامى و يدخلوا الاودة و يقفلوا عليهم و يبعدوا عن وشى
-البس و انزل اتمشى حوالين البيت شوية لحد ما اهدأ
- اطلع السطح فوق البيت فى هدوء الليل و ابص على النجوم و اعيش مع الهدوء و النسمة الرقيقة
مجرد ماحطيت لنفسى حلول بديلة عن الصوت العالى و الشتيمة و الضرب
بالتدريج و بالتركيز لاحظت :
بدأت نوبات العصبية تقل بالتدريج ....لم تنتهى خالص مرة واحدة
يعنى كان فيه تحسن بنسبة 20% ...
بمعنى كل خمس مرات بتعصبها فى اليوم فيه مرة بفتكر فيها البديل ..بقيت بتعصب عليهم اربع مرات بس ..و دا تحسن و تطور ...شجعت نفسى و قلت استمرى
بدأت اعمل البديل مرتين بدل مرة واحد ...يعنى فيه تقدم ..استمرى
بدأت اعمله تلات مرات ..هايل ممتاز ..كنت بجيب لنفسى شيكولاته و آيس كريم جايزة على التقدم
المهم مع الوقت و الصبر على النفس ...الحمد لله توقفت عن العصبية اليومية عليهم
دا غير ان مع تقليل نوبات العصبية هم كمان بقوا أهدأ كتير عن الأول
و مع ذلك فيه ايام بكون فيها مضغوطة و لو بس نادولى (ماما ) ممكن اهيج عليهم
سامحت نفسى على الايام دى طالما مش كتير ..لان محدش هيقدر يكون مثالى
و بعتذر ليهم عن عصبيتى و بشرح لهم ليه انا كنت عصبية فى اليوم دا
السلوك الشخصى ممكن يتغير بالتركيز عليه
و وضع البديل
و الصبر على النفس لحد ما تتعود عليه
مع الدعاء و الرجاء من ربنا انه يعينى و يقوينى
ولما بتنجح مع نفسك و تقدر تأثر عليها ...بتحس ان ثقتك فى نفسك فى السما
و أكيد مؤكد لما تقدر تغير نفسك ...هتملك القدرة على التأثير و التغيير فى الآخرين و خاصة اولادك
لكن لو انت مش عارف تتغير و مش قادر على نفسك ..يبقى الطفل الصغير هيتغير إزاى و هتقدر تغيره ازاى ؟
ليست هناك تعليقات:
إرسال تعليق