محدش بيحبنى ....خليك لطيف

من الحاجات الى بتخليك تفقد ثقتك فى نفسك انك تحس انك غير مقبول من الآخرين أو غير محبوب
يعنى تحس ان الناس بتتتجنبك او بتنفر منك او مش طايقاك
و دا بيخليك دايما حاسس انك لست أهل للحب و بيقلل من ثقتك فى نفسك

عارف لو تنوى كل يوم تعمل عمل لطيف لأى حد أدامك مكنتش بتعمله قبل كدة
مع الوقت هتلاقى الناس قبولها ليك و تعاملها معاك أفضل بكتير

على سبيل المثال :

الراجل الى بياخد الزبالة صبح عليه و ابتسم فى وشه و قل له انا متشكر جدا على الى انت بتعمله دا

العامل الى بيجيب لك القهوة كل يوم اديله عشرة جنيه من غير مناسبة و اشكره

طلع تى شيرت والا بنطلون معنتش بتلبسه و اديله للبواب او ابنه

و انت بتشترى من الست الغلبانة بتاعة الخضار ماتاخدش الباقى

بوس ابنك و احضنة كدة من غير مناسبة و قل له وحشتنى

طبطب على مراتك و بص لها بحنية و قل لها ما اتحرمش منك

بوسى جوزك كدة من غير مناسبة و قوليله ربنا يخليك لى

شفت حد شايل شيل كتير اعرض عليه المساعدة

شفت واحد متضايق أقعد اسمعه

حط فى مخك كل يوم تعمل كدة موقف لطيف

المواقف دى حاجات بسيطة اوى ...و مردودها مش على الناس بس
دى بتخليك مبسوط من نفسك انك عملت فعل طيب ..فى زمن عز فيه من يفعل حاجة لله

بتحس بالتميز و انك مختلف ..و دا بيزود ثقتك فى نفسك