ازاى تقاوم كلام الناس

كلام الناس الى حواليك و رأيهم فى تصرفاتك و شخصيتك و أفكارك بيبقى مهم ليك فى مراحل حياتك الاولى لانك بتكون قليل الخبرة و العلم
و بتكون لسة بتدور على نفسك فى وسط العالم الى انت عايش فيه

لكن اتعجب من ناس عدوا الاربعينات من حياتهم و لسة بتعمل حساب أوى لكلام الناس

مهم تفرق بين نوعبن من كلام الناس

الناس الى بتحبك و حريصة على مصلحتك و فعلا بتقولك كلام صادق و بتنصحك من قلبها و دى نصيحتهم و كلامهم بيبقى اصلا قليل

و فيه ناس كل شغلتها فى الحياة النقد و الاتهام و انها تجيب فى سيرة الناس و مش عاجبها احد ابدا فى الكون و بتتكلم فراغ
فدول الافضل انك تبعد عنهم
و لو مش قادر حاول تبنى نفسك من جواك بحيث لا تتأثر بكلامهم

حتى أبوك و أمك

لو انت مابتعملش حاجة غلط دينى أو اخلاقى او غلط قانونى او اجتماعى

فلا تلق بالا حتى لأنتقاد ابوك و امك
ابوك و امك عايزين مصلحتك الى هم شايفينها
شايفينها على حسب معرفتهم و خبراتهم فى الحياة
شايفينها على حسب طبيعتهم الشخصية و البيئة الاجتماعية الى عاشوا فيها
مش لازم رؤيتهم تكون مصلحتك بجد ....هى ممكن تكون مصلحتك من وجهة نظرهم هم

يخطىء الكثير من الاباء فى فرض رؤيتهم على ابنائهم
و الكثير من الابناء للاسف يعانون من ضعف الثقة بنفسهم و قراراتهم و بيسمعوا الكلام عميانى

يدخلوهم الكلية الى هم عايزيتها مع ان الابن قدراته و موهبته و رغبته مختلفة تماما عما يريدون

يجوزوهم الى على مزاجهم مع ان مزاجه و قلبه و رغبته فى شخصية تانية خالص
يشغلوهم الشغلانة الى هم عايزبنها مع ان الولد رغبته مختلفة تماما

رأى الآباء يحترم و يقدر
لكن مش لازم يكون هو الصح ليك

عايزة تتجوز من تحب بأقل الامكانات الممكنة بس خايفة من كلام الناس

هى لو انتظرت لحد ما تتحسن امكاناته هتلاقى بعض الناس بتتكلم عن التأخير و ان دا بيكتر المشاكل و هيفضل كدة داخل خارج عليهم و هو راجل غريب و هى مش على ذمته
و هى كمان كبرت و سنها بيكبر و مش هتعرف تخلف و ....و..... !!!!!
و هتلاقى البعض بيقول يعنى هى يعنى لازم تدخل جاهزة من مجاميعه !!!!!

و لو اتجوزت باقل الاشياء هيقولوا هى كانت متسربعة على الجواز ليه ماكانت تصبر شوية !!!!!
و هتلاقى البعض يقول دا مجابش و دا مجهزش و ماعملش و ابوها الى عمل زى مايكونوا واقعين و ماصدقوا يلاقولها عريس

الناس عمرها ما هتسكت
اعملى الى انت عايزة تعمليه طالما صح

وفيه ناس تنتقد الآخرين بعيوبهم هم

يعنى يبقى مثلا بخيل و شايف دايما الناس بخيلة
يبقى حساس و قماص و شايف الناس كلها حساسة و قماصة
يبقى بذىء و قليل الادب و مش شايف فى الناس غير كونها قليلة الادب

دا بيبقى احساس بعدم الامان الداخلى و خوف من نظرة الاخرين ليه
فبيحاول يلفت نظر الناس الى نفس العيب عند الاخرين علشان يصرف نظرهم عنه او لسان حاله بيقول مش انا بس الى كدة فيه ناس كتير كدة


الناس كمان مختلفين تماما فى رغباتهم و فيما يحبون و ما يكرهون و فيما يفضلون و كيف يسعدون و متى يشعرون بالانجاز

فيه واحد مثلا بيحس بالراحة و السعادة لما يعد فى الطبيعة لوحده
و فيه واحد تانى لايشعر بالسعادة الا و هو وسط الناس

فيه واحد بيرتاح لما يسمع كلام صوته الداخلى و احساسه العميق
وواحد تانى بيحب يستشير و ياخد راى الناس و يعمل بيه

واحد بيحب يكون منظم جدا فى حياته وواحد تانى عشوائى و ما يحبش النظام الصارم

فيه واحد دايما عايش فى الماضى وواحد كل تفكيره على الواقع و الحاضر و وواحد كل تركيزه على المستقبل

الناس مختلفة

و علشان كدة ممكن تتلقى نقد او نصيحة او لوم او تسمع حد بيتكلم عليك حتى ولو كان من قلب بيحبك
بس دا رأيه هو عنك.... دا مش انت

كل ما بتفهم نفسك كويس و كل ما بتفهم الاخر و تدرك الاختلافات الى بينكم
كل ما هتكون انتقائى فى قبول كلام الناس و نقدهم و رأيهم فيك لانهم بيتكلموا من منطلقاتهم هم مش من منطلق طبيعتك الشخصية انت
و كل ما هتبقى انت نفسك مقل فى نقدهم و لومهم

يعنى دايما مثلا تلاقى الانفتاحى يقول على الانطوائى انه مش بيحب الناس
و الانفتاحى يقول على الانطوائى انه منفتح زيادة عن اللزوم
و الاتنين ينتقدوا بعض
لما بتفهم
بتبدأ يقل نقدك و يقل تأثرك بالنقد