الكسل و التسويف و التأجيل أحد مشاكلنا النفسية الى بتقلل ثقتنا فى نفسنا الى حد كبير لانها بتحسسك بقلة قدرتك على التحكم فى ذاتك و بتقلل قدرتك على الانجاز
التأجيل و التسويف له اسباب كتيرة
ممكن يكون طبع فيك ..يعنى عايز تأجل كل حاجة و مش عايز تعملها دلوقت
ودا لانك كسول و وقتك غير منظم و دايما مش جايلك نفس تعمل اى حاجة
او انك متردد و مش بتعرف تاخد القرار فبتأجل لحد ما حد ياخدلك القرار او الظروف تدفعك لاتجاه معين
و ممكن يكون حاجة خاصة بالمهمة نفسها الى انت دايما بتسوفها
يعنى مهمة مملة و دمها تقيل على قلبك
أو حاسس انها مهمة صعبة اوى و معلوماتك او مهاراتك فيها ضعيفة و خايف من الفشل فى اداءها
أو انك من النوع الى عايز تعمل كل حاجة صح مية مية و مش هتعرف توصل للمستوى دا
لازم تعترف الاول بالمشكلة الى فيك و تعرف اعراضها
انك دايما بتأجل الحاجة لما الظروف تتحسن او لما ييجى مزاجى او لآخر وقت
انك دايما تضيع وقتك فى حاجات مالهاش لازمة و تسيب الحاجات المهمة
لو قررت تعملها دلوقت تفضل تدور على حاجة تضيع فيها الوقت .تروح تعمل كوباية شاى ..تفتح الفيس ..تفتح التليفزيون ..تتصل بحد ..عايز تهرب
لازم تدرك خطورة او عواقب التسويف دا على حياتك ..بتضيع منك فرص كتير و بعدين تقول حظى وحش
و بيضيع وقتك و حياتك فى حاجات مالهاش لازمة
و كمان بيفضل بالك مشغول بالمهمة دى و حاسس بالزهق و الكآبة انها مش بتتعمل يعنى بتأثر على مزاجك العام
و يمكن كمان تخليك تكذب و تخترع اعذار لما حد يسألك ماعملتش ليه و بيبقى المنظر زبالة لو اكتشفت الكدبة و تخليك تحس بالضآلة و تأنيب الضمير اكتر و اكتر
و علشان نقاوم التسويف و الكسل فيه أفكار كتيرة :
- حط لستة المهام اليومية المهمة الى لازم تخلص النهاردة و حط لكل مهمة وقت محدد هتبدأ تشتغل فيه
- قسم المهام بتاعتك الى مهام عاجلة و مهمة ..و هى دى الى تبدأ بيها
- لو بتتحمس بالتنافس حط نفسك فى تنافس مع صديق او شريك حياة ...يعنى انت وراك كذا و انا ورايا كذا و نتعاهد بعض مين خلص المهمة ...او خلى حد يتابعك و يقف وراك بالخرزانة
- حط لنفسك جايزة لو انجزت مهامك اليومية ..حاجة بتحبها
- اعمل المهمات الصعبة اولا فى يومك ..و خليها قاعدة علشان تخلص منها بسرعة
- فكر نفسك دايما بالنتايج الى انت هتجنيها لو انجزت المهمة دى بسرعة
- لو المهمة صعبة و كبيرة قسمها لاجزاء صغيرة و انجز جزء جزء على عدة فترات متقطعة
- ماتعدش محتار تبدأ من فين ..ابدأ من أى حتة و هتنجز
- لو المهمة تقيلة على قلبك ..اعرف ان التقل دا هتفضل شايله طول ما انت مش بتعملها ..لكن لو عملتها و خلصت منها التقل هيروح
- لو مش عارف تاخد قرار و دايما متردد خد كورس فى اتخاذ القرارات علشان يوريك التفكير المنظم العملى لكيفية اتخاذ القرار
- ابعد نفسك عن الملهيات ...حط تليفونك بعيد عنك ..اقعد فى اودة بعيدة عن التليفزيون ...اعمل كوباية الشاى او القهوة قبل ما تبدأ
قدرتك على انك تقهر نفسك و تنجز المهمة او جزء منها فى الوقت المحدد دا هيديك احساس بالثقة فى نفسك و يرفع من معنوياتك و يشجعك على اتمام المهمة
الطاقة اللازم لبداية حركة العربية أقل من الطاقة اللازمة لاستمرار حركتها
يعنى انت محتاج عزم كبير و انت طالع بالعربية ..غير خالص العزم اللازم للاستمرار
محتاج تشحن نفسك و تشجعها فى البداية ..واول ماتتشحن هتنطلق بأمر الله
وردد دوما (اللهم انى اعوذ بك من العجز و الكسل )
ليست هناك تعليقات:
إرسال تعليق