الثقة بالنفس و الحساسية

كلما زادت ثقتك فى نفسك ..كلما قلت حساسيتك لاساءة الآخرين

طول ما احنا دايما بنهتم لرأى الناس فينا ..طول ما حساسيتنا للاساءة بتزيد
طول ما احنا فكرتنا عن نفسنا نابعة من رأى الآخرين فينا ..كل ما هنتألم انهم بيعاملونا وحش
طول ما انت عايز ترضى الناس كلها علشان يحبوك ...طول ما هتزعل ان حد فيهم مش راضى عنك

عن تجربة

ثقتك فى نفسك بتخليك تتلقى الاساءة على انها سوء خلق من الآخر
مش عيب فيك ..يعنى دى مشكلته هو

ثقتك فى نفسك بتخليك تعرف انك أهل للحب ..لكن مش معنى كدة ان لازم تنال حب كل الناس ..لان فيه ناس هتكرهك بدون سبب

ثقتك فى نفسك هتخليك مايهمكش رأى الناس فيك ...بالعكس انت ممكن تستفيد من رأيهم فى اصلاح عيوبك لو فعلا حقيقية

من سنين طويلة سمعت دكتور ابراهيم الفقى بيحكى على واحد وقف فى وسط محاضرة من محاضراته و قال له ..انت حمار

فالدكتور رد عليه : رأيك فىّ لا يدل علىّ
لو انت شايفنى حمار يبقى العيب في عيونك مش فىّ

عجبتنى الفكرة و حاولت ابرمج نفسى عليها و الحمد لله نجحت الى حد كبير فى معالجة الحساسية الزيادة