شريك حياتك اهم من اولادك
لما بقول كدة لزوجة او لزوج بينصدم و يقول ازاى
الزوجة تقول ايوة هو مهم بس اولادى طبعا اهم
ولما اقول للزوج يقولى لأ طبعا اولادى اهم و امى و اخواتى كمان و اصحابى كمان
زوجك و زوجتك هو شريييييك حياتك
يعنى الانسان الى المفروض هيعيش معاك حتى اخر العمر
ولادك هيكبروا و هيسيبوك ان عاجلا او اجلا
امك هتعجز فى يوم و بعد عمر طويل ربنا هيتوفاها
اخواتك كل واحدة وواحد فيهم هتتلهى ببيتها و اولادها
اصحابك مش هيعيشوا معاك
شريك حياتك هو دا الى هيفضل معاك لما حبايبك كلهم يبعدوا عنك
لما تكبر وتعجز و تمرض و تحتاج انيس يؤنس وحدتك و رفيق تتعجز عليه
علشان كدة لازم يكون اهم انسان فى حياتك
و هو كمان اكبر اسباب سعادة قلبك لو حافظت على علاقتك بيه ممتازة
فالحب بين الزوجين من اعظم مايجلب السعادة
و هو دا الى هيدفعك للنجاح فى حياتك او هيجيبك الارض
فمهما نجحت فى شغلك فلن تشعر ابدا بالسعادة لو كانت علاقتك بيه فاشلة و مضطربة
شريك حياتك اكتر انسان مؤثر عليك لانه اكتر انسان عايش معاك و بتشوفه و بتكلمه و بتنام جنبه و بتاكل معاه و بتسافر معاه و بيبقى معاك فى اوقات فرحك و حزنك ..صحتك و مرضك ....انشغالك و فراغك ...شبابك و هرمك ..
ليه دايما مش حاسين بقيمة العلاقة دى
الاطفال اكيد بياخدوا مجهود جبار من الست و خاصة فى السن الصغير الى لسة معتمدين فيه عليكى ...
بس مش معنى كدة انك تكونى عاملة زى انثى العنكبوت الى تتزاوج و بعدين تقتل جوزها ...ايوة بتقتليه بالاهمال و التجاهل و انه يبقى بابا و يبقى بالنسبة ليكى ابو العيال و الممول فقط لاغير
الشغل و ساقية الدنيا اكيد بتاخد منك مجهود ذهنى و جسدى و نفسى ...
بس مش معنى كدة ان البيت يتحول لمجرد لوكاندة تروح فيها تاكل و تنام و تغير و بس ...
شريكة حياتك بتكون محتاجة ليك و انت كمان بتكون محتاج ليها
محتاجين فى آخر اليوم الشاق جرعة حنان و حب و رحمة
و طبطبة و حنية ..مين هيديهالك الا شريك حياتك
محتاجين تتكلموا مع بعض ..تهزروا مع بعض ...تضحكوا مع بعض ...تحضنوا بعض ...تحسسوا على بعض ...تقبلوا بعض ...تبصوا لبعض
اسمعوا غنوة حلوة مع بعض و رددوها مع بعض
اتفرجوا على فيلم رومانسى مع بعض و انتوا فى حضن بعض
افتكروا ذكرياتكم الجميلة مع بعض و انت ماسكين ايد بعض
فكروا و احلموا مع بعض و انتوا راسكم على حجر بعض
صلوا ركعتين و ادعوا ربنا يحفظكم و يحفظ ولادكم مع بعض
انتم الاتنين محتاجين دا
و انتم الاتنين لازم لازم يبقى ليكم وقت يومى يبقى ليكم انتم الاتنين بس مع بعض
مهما كانت المشاغل
مهما كانت الهموم
مهما كانت المسئوليات
خلى اللحظات دى هى لحظة السكون و الهدوء و الراحة خليها لحظات بتاخد فيها جرعات من السعادة و الهناءة و الضحكة الصافية
خليها اوقات سعادتكم و سموها ساعة سعادة
هى دى الى هتحفظ علاقتكم و تحفظ بيتكم و تحفظ شريك حياتك و تحفظ حبه ووده و رحمته حتى اخر العمر
ليست هناك تعليقات:
إرسال تعليق