كل الناس بقت وحشة

لو حاسس ان كل الناس بقت وحشة
فسامحنى
من غير ما اعرفك ...غالبا انت الى عندك المشكلة

ممكن تكون مشكلتك فى قلة ثقتك بالآخرين نتيجة تربية خاطئة او تجربة مريرة أثرت علي نفسيتك

ممكن تكون من النوع الى عايز كل الناس تمشى على الصراط المستقيم و ماتغلطش و دا أمر مستحيل

ممكن تكون من النوع الى مش بيستحمل الاختلاف و اى حد مختلف فى تفكيره و تصرفاته يبقى علطول وحش

ممكن تكون من النوع النرجسى الى حاسس ان هو بس الكويس و باقى البشرية أغبياء

ممكن تكون من النوع الحساس الى بياخد اى تصرف بشكل شخصى تماما و بيكبره كما لو ان التصرف موجه لاهانته

شفت كتير النوعيات دى فى مجتمعنا الى طول النهار يشتموا فى الناس و ممكن كمان يعتزلوهم و يعيشوا فى حالهم

على فكرة

الناس طول عمرها كدة ..من قديم الأزل كان فيه قابيل الى قتل اخوه
كلنا بلا استثناء فينا جانب وحش
بس فيه ناس بيغلب شرهم خيرهم و هم دول الى فعلا يستاهلوا انك تتجنبهم و تبعد عنهم اتقاء شرهم
أما لو حسيت ان الكل مش عاجبك ..يبقى دور على المشكلة فى نفسك انت