خطيبى هو كل حياتى

اكبر غلط بتقع فيه البنت انها تهمل كل علاقاتها بالناس الى حواليها و تخلى خطيبها او زوج المستقبل هو كل حياتها عايزاه يصبح عليها كل يوم الصبح عايزاه يكلمها كل نص ساعة عايزاه يقابلها كل يوم لازم تكون عارفة تفاصيل هو رايح فين و جاى منين بمنتهى الدقة لو قال لها انا خارج مع اصحابى يبقى نهار ابوه اسود لو اتأخر شوية أو انشغل فى شغله و ماقدرش يتواصل معاها تبقى خناقة و ياسلام لو اتصلت بيه ولقت الموبايل مغلق تبقى وقعته مهببة و يا عينى لو وقع من طوله و نام بالليل و نسى يقول لها تصبحى على خير و يا وقعته السودة لو قال انا مسافر مع اصحابى رحلة و يا عينى عليه لو شافته بيقول لزميلته صباح الخير و بيبتسم و يبقى يوم مش فايت لما يقول لها معلش انا انشغلت النهاردة مع اختى أو امى عند الدكتور للاسف احدى مشكلات وسائل التواصل الحديثة هى مشكلة التعلق فى العلاقات ناس بتتواصل بشكل يومى صباحا و ظهرا و مساءا و بيكلموا بعض كل شوية و بيعتادوا على كدة شهور و سنين لحد ماتبقى ادمان هى عايزاه يملا عليها كل حياتها الشاب بيبقى فرحان و مبسوط فى البداية انه واخد كل اهتمامها بس بعد وقت بيتخنق و بيحس انه مسجون جوة حبها و قلقها عليه و رغبتها فى تملكه و انه يبقى بتاعها هى بس و بيزهق من المشاكل ياحبيبتى الحب دا حب سجين لازم تديله فرصة يشم نفسه لازم تطلقى الحرية للسجين يا اما مسيره هيعمل حاجتين : اما انه يتململ و يزهق و يبدا يتخانق و يتضايق من ضيقك المتواصل و ألمك لفراقه او انه هيهرب من السجن و يسيبك تضربى دماغك فى الحيط اشغلى وقتك و تفكيرك بأى حاجة غيره لازم يكون ليكى اصدقاء او اهل مقربين ممكن تقضى معاهم وقت لطيف لازم يكون ليكى شغل او دراسة او حاجة بتشغل تفكيرك غيره لازم تشغلى وقتك بانشطة و هوايات تملأ فراغك صدقينى الحب الخانق دا لايعيش لان مشاكله كتير جدا مشاعر القلق و الرغبة فى التواصل المستمر مش هتقدرى تسيطرى عليها فى البداية بس ممكن تتحكمى فى تصرفاتك الى بتضايقه يعنى هتفضلى على نار لما يعد تلات ساعات مايتصلش ..بس لما يتصل خليكى عادى و اتكلمى عادى و قوليله بس وحشتنى هتبقى هتموتى لو خرج مع اصحابه يتفسح ..بس ماتعمليش منها حكاية و رواية و قوليله انا سعيدة بدال انت سعيد هتحسى بالألم انه نسى يقولك تصبحى على خير و يمكن مايجيلكيش نوم طول الليل ...بس لما يصحى قوليله صباح الفل ياحبيبى من غير ما تنكدى عليه يومه مشاعرنا كتير مش بنقدر نسيطر عليها بس تصرفاتنا لازم نتحكم فيها بالعقل و اللازقة دى غير صحية ابدا فى اى علاقة انسانية لانها بعد فترة بتزهق التانى جدا و بتحصل اللازقة دى بين الاصدقاء بردة و بتؤدى الى انهيار الصداقة بينهم خطيبك لو هو كل حياتك بس مش واجب عليه تكونى انت كل حياته لان فيه فى حياته شغله و اهله و اصحابه و هواياته و حاجات كتير لاتقل اهمية عن وجودك فى حياته