خطيبتك مش مراتك

من أكتر السلوكيات الى بتستفزنى جدا لما الخطيب يطلب من خطيبته الى لسة مش مراته

يطلب منها التواصل الجسدى او كلام اباحى او صور و يتعامل معاها كانها زوجته

و يقولها يعنى اروح اغلط مع حد تانى ؟
و يمارس عليها ضغط نفسى و يحسسها بالذنب لو هى استجابت و بالذنب لو هى رفضت

يا سيدى دى لسة خطيبتك مش على زمتك علشان تطلب منها الامور دى

و لو حاسس انك هتغلط روح اغلط براحتك وسيبها فى حالها بدل ما توقعها فى الغلط هى كمان

اوعى تستسلمى لهذا الضغط النفسى الى بيمارسه عليكى

الى مش هيقدر يمسك نفسه عن الغلط من دلوقت مش هيمسك نفسه بعد الحمل و الولادة و المرض و اوقات انتى مش مستعدة للتواصل
و هيفضل يغلط و يرمى عليكى اللوم

الوقوع فى الغلط ليس له مبرر

يا اما هنبرر للحرامى انه ياعينى محتاج
و نبرر للقاتل انه ياعينى متغاظ
و نبرر للزانى انه ياعينى محروم

المصيبة ان البنت ساعات تقول مسكين عليه ضغوط كتير و البنات حواليه فى الشارع و الاعلام و وسائل التواصل و مش قادر يمسك نفسه

ياحبيبتى احنا ممكن نعذر الطفل الصغير الذى لم ينضج فكره و ضميره و قدراته على السيطرة الذاتية و لسة بيعمل بيبى على روحه و ياخد الشيكولاته الى مش بتاعته و يشبط فى اللعبة الى ادامه ونقول مش قادر يمسك نفسه

لكن مايبقاش راجل طويل عريض و المفروض انه انسان واعى و ناضج و مش قادر يمسك نفسه عن الوقوع فى الغلط